കൊവിഡ് കേസുകളില് നേരിയ വര്ധന ജില്ലകള്ക്ക് ജാഗ്രതാ നിര്ദേശം: മന്ത്രി വീണാ ജോര്ജ്
കൊവിഡ് പുതിയ വകഭേദത്തിന് വ്യാപനശേഷി കൂടുതലാണ്. അതിനാല് സ്വയം പ്രതിരോധമാണ് ഏറ്റവും പ്രധാനം
തിരുവനന്തപുരം :സംസ്ഥാനത്ത് കൊവിഡ് കേസുകളില് നേരിയ വര്ധനവെന്ന് ആരോഗ്യ വകുപ്പ് മന്ത്രി വീണാ ജോര്ജ്. ചൊവ്വാഴ്ച 172 കേസുകളാണ് ഉണ്ടായിരുന്നത്. തിരുവനന്തപുരം, എറണാകുളം ജില്ലകളിലാണ് കൊവിഡ് കേസുകള് കൂടുതല്. ആകെ 1026 കൊവിഡ് ആക്ടീവ് കേസുകളാണുള്ളത്. 111 പേരാണ് ആശുപത്രികളില് ചികിത്സയിലുള്ളത്. എല്ലാ ജില്ലകള്ക്കും ജാഗ്രതാ നിര്ദേശം നല്കിയിട്ടുണ്ട്. നിരീക്ഷണം ശക്തിപ്പെടുത്താന് മന്ത്രി നിര്ദേശം നല്കി.
സംസ്ഥാനത്തെ കൊവിഡ് സ്ഥിതി വിലയിരുത്തുന്നതിന് മന്ത്രി വീണാ ജോര്ജിന്റെ നേതൃത്വത്തില് ഉന്നതതല യോഗം ചേര്ന്നു. ദിവസവും കൊവിഡ് കേസുകള് ആരോഗ്യ വകുപ്പ് അവലോകനം ചെയ്തു വരുന്നു. സംസ്ഥാനത്ത് കോവിഡ് ക്ലസ്റ്ററുകള് രൂപപ്പെട്ടിട്ടില്ല. ആശുപത്രി സജ്ജീകരണങ്ങള്ക്കായി ജില്ലകളും ആശുപത്രികളും സര്ജ് പ്ലാന് തയ്യാറാക്കണം. കൊവിഡ് രോഗികള് വര്ധിക്കുന്നത് മുന്നില് കണ്ട് ഐസിയു, വെന്റിലേറ്റര് ആശുപത്രി സംവിധാനങ്ങള് കൂടുതല് മാറ്റിവയ്ക്കാനും മന്ത്രി നിര്ദേശം നല്കി. പുതിയ വകഭേദം വന്നിട്ടുണ്ടോയെന്നറിയാന് ജിനോമിക് പരിശോധനകള് വര്ധിപ്പിക്കും. മെഡിക്കല് കോളേജുകളില് കൊവിഡ് രോഗികളുടെ എണ്ണം കൂടിയിട്ടില്ല. ആവശ്യമായ പരിശോധന കിറ്റുകളും മരുന്നുകളും സജ്ജമാക്കാന് കെഎംഎസ്സിഎല്ലിന് നിര്ദേശം നല്കി.
കൊവിഡ് പുതിയ വകഭേദത്തിന് വ്യാപനശേഷി കൂടുതലാണ്. അതിനാല് സ്വയം പ്രതിരോധമാണ് ഏറ്റവും പ്രധാനം. കൊവിഡ് പ്രതിരോധത്തിന് മാസ്ക് ധരിക്കേണ്ടതാണ്. മറ്റ് രോഗമുള്ളവരും, പ്രായമായവരും, കുട്ടികളും, ഗര്ഭിണികളും പ്രത്യേകം ശ്രദ്ധിക്കണം. അവര് പൊതുസ്ഥലങ്ങളില് പോകുമ്പോള് മാസ്ക് കൃത്യമായി ധരിക്കണം. ആശുപത്രികളില് എത്തുന്നവരെല്ലാവരും നിര്ബന്ധമായും മാസ്ക് ധരിക്കണം.
Thanks for sharing. I read many of your blog posts, cool, your blog is very good.