നഷ്ടപ്പെട്ടതെല്ലാം തിരിച്ചെടുക്കാൻ ഒരുങ്ങുകയാണ് ഡാളസിലെ ഈ പള്ളി; തറക്കല്ലിടൽ ഉടനെ

ഡാളസ്: തീപിടിത്തത്തിൽ തകർന്ന ചരിത്രപ്രസിദ്ധമായ ഫസ്റ്റ് ബാപ്റ്റിസ്റ്റ് ഡാളസ് പള്ളിയുടെ പുനർനിർമ്മാണ പ്രവർത്തനങ്ങൾ ഉടൻ ആരംഭിക്കുന്നു. 2024 ജൂലൈയിൽ ഉണ്ടായ അതിശക്തമായ തീപിടിത്തത്തിൽ പള്ളിയുടെ മേൽക്കൂരയും ആരാധനാലയവും പൂർണ്ണമായും നശിച്ചിരുന്നു. 150 വർഷത്തോളം പഴക്കമുള്ള ഈ ആരാധനാലയം തെക്കൻ ബാപ്റ്റിസ്റ്റ് വിഭാഗത്തിന്റെ അഭിമാനമായി കണക്കാക്കപ്പെടുന്ന ഒന്നാണ്.

തീപിടിത്തത്തിൽ പള്ളിയുടെ പ്രധാന ഭാഗങ്ങൾ നശിച്ചെങ്കിലും അത്ഭുതകരമായി പഴയ പൾപിറ്റ് (പ്രസംഗപീഠം) കേടുപാടുകൾ കൂടാതെ രക്ഷപ്പെട്ടിരുന്നു. തീപിടിത്തത്തിന് പിന്നിൽ അട്ടിമറി നടന്നിട്ടില്ലെന്ന് അന്വേഷണത്തിൽ കണ്ടെത്തിയെങ്കിലും യഥാർത്ഥ കാരണം ഇപ്പോഴും അവ്യക്തമായി തുടരുന്നു. പാസ്റ്റർ റോബർട്ട് ജെഫ്രസിന്റെ നേതൃത്വത്തിലുള്ള 16,000 അംഗങ്ങളുള്ള ഈ പള്ളി പുതിയ ആരാധനാലയം പണിയുന്നതിനായി ‘മിഷൻ 18’ എന്ന പേരിൽ 95 ദശലക്ഷം ഡോളർ സമാഹരിക്കുന്ന ചരിത്രപരമായ ധനസമാഹരണവും ഇതിനകം നടത്തിക്കഴിഞ്ഞു.