മണിപ്പൂരിൽ വീണ്ടും ചോരക്കളി; മൂന്ന് ബാപ്റ്റിസ്റ്റ് പാസ്റ്റർമാരെ പതിയിരുന്ന് കൊലപ്പെടുത്തി!

മണിപ്പൂർ : മണിപ്പൂരിലെ വംശീയ സംഘർഷങ്ങൾ ഒടുങ്ങുന്നില്ലെന്ന് തെളിയിച്ചുകൊണ്ട്, മെയ് 13-ന് രാവിലെ 10 മണിയോടെ കുക്കി ബാപ്റ്റിസ്റ്റ് ക്രൈസ്തവർക്ക് നേരെ നടന്ന ആക്രമണത്തിൽ മൂന്ന് പാസ്റ്റർമാർ കൊല്ലപ്പെട്ടു. കാങ്‌പോക്പിക്കും ലംകയ്ക്കും ഇടയിലുള്ള റോഡിൽ, ഒരു പള്ളി മീറ്റിംഗിൽ പങ്കെടുത്തു മടങ്ങുകയായിരുന്നു ഇവർ. സമാധാനത്തിന്റെ സന്ദേശം പ്രചരിപ്പിക്കേണ്ടവർ ഇത്തരത്തിൽ ക്രൂരമായി കൊലചെയ്യപ്പെടുന്നത് മണിപ്പൂരിലെ ക്രമസമാധാന നില എത്രത്തോളം തകർന്നു എന്നതിന്റെ തെളിവല്ലേ? നിങ്ങൾ തന്നെ ഒന്ന് ചിന്തിച്ചു നോക്കൂ!

ഇതുവരെ കുക്കി, മെയ്തെയ് വിഭാഗങ്ങൾക്കിടയിൽ മാത്രം ഒതുങ്ങിനിന്നിരുന്ന സംഘർഷത്തിലേക്ക് ഇപ്പോൾ സംസ്ഥാനത്തെ മൂന്നാമത്തെ വലിയ വംശീയ വിഭാഗമായ നാഗാ സായുധ സംഘങ്ങളും ഇടപെട്ടു എന്ന വാർത്ത ഏറെ ആശങ്കയുണ്ടാക്കുന്നതാണ്. ആക്രമണത്തിന് പിന്നിൽ ഒരു സായുധ നാഗാ ഗ്രൂപ്പാണെന്ന് കുക്കി സമൂഹം ആരോപിക്കുന്നു. ആക്രമണത്തിൽ മറ്റ് നാല് പാസ്റ്റർമാർക്കും രണ്ട് ഡ്രൈവർമാർക്കും ഗുരുതരമായി പരിക്കേറ്റിട്ടുണ്ട്.

യുണൈറ്റഡ് ക്രിസ്ത്യൻ ഫോറം ഓഫ് നോർത്ത് ഈസ്റ്റ് ഇന്ത്യ ഈ സംഭവത്തിൽ ശക്തമായ പ്രതിഷേധം രേഖപ്പെടുത്തിയിട്ടുണ്ട്. കുറ്റവാളികളെ എത്രയും വേഗം കണ്ടെത്തി നിയമത്തിന് മുന്നിൽ കൊണ്ടുവരണമെന്നും സമഗ്രമായ അന്വേഷണം വേണമെന്നും അവർ സർക്കാരിനോട് ആവശ്യപ്പെട്ടു. സമാധാനത്തിലേക്ക് മടങ്ങാൻ ശ്രമിക്കുന്ന മണിപ്പൂരിൽ ഇത്തരം സംഭവങ്ങൾ വീണ്ടും സംഘർഷം ആളിക്കത്തിക്കില്ലേ? ഒരു സംസ്ഥാനം മുഴുവൻ തോക്കിൻ മുനയിൽ കഴിയേണ്ടി വരുന്നത് വല്ലാത്തൊരു ദുരവസ്ഥയല്ലേ?