*ജയിൽ പൂട്ടി അധികൃതർ മുങ്ങി, ജയിലുകൾ ഇനി തോക്കിൻമുനയിൽ*

ഇറാൻ : അമേരിക്കയും ഇസ്രായേലും നടത്തിയ ബോംബാക്രമണങ്ങൾക്ക് പിന്നാലെ ഇറാന്റെ ജയിലുകൾ ഭീതിയുടെ നിഴലിലായിരിക്കുകയാണ്. ജയിൽ ഉദ്യോഗസ്ഥർ പലരും തങ്ങളുടെ സ്ഥാനങ്ങൾ ഉപേക്ഷിച്ചു പോയതോടെ, ക്രൈസ്തവ വിശ്വാസികളും രാഷ്ട്രീയ തടവുകാരും ഉൾപ്പെടെയുള്ളവരുടെ ജീവിതം അതീവ ഗുരുതരമായി. നിലവിൽ പ്രശസ്തമായ എവിൻ ജയിൽ ഉൾപ്പെടെയുള്ളവയുടെ നിയന്ത്രണം ‘നോപ്പോ’ എന്നറിയപ്പെടുന്ന തീവ്രനിലപാടുകാരായ പാരാമിലിറ്ററി വിഭാഗം ഏറ്റെടുത്തിരിക്കുകയാണ്. ഇതോടെ തടവുകാർക്ക് പുറംലോകവുമായുള്ള ബന്ധം പൂർണ്ണമായും നിലച്ചു.

ജയിലിലെ ഷോപ്പുകൾ അടച്ചതും കവാടങ്ങൾ പൂട്ടിയതും മൂലം ഭക്ഷണം പോലും ലഭിക്കാതെ തടവുകാർ പട്ടിണിയിലായ അവസ്ഥയാണ്. ജയിലിനുള്ളിൽ എന്താണ് സംഭവിക്കുന്നതെന്ന് അറിയാൻ കഴിയാത്തത് ബന്ധുക്കളെ വലിയ ആശങ്കയിലാക്കുന്നു. വിശ്വാസത്തിന്റെ പേരിൽ ജയിലിൽ കഴിയുന്ന ക്രൈസ്തവർക്ക് ഈ പുതിയ സാഹചര്യം വലിയ സുരക്ഷാ ഭീഷണിയാണ് ഉയർത്തുന്നത്. അന്താരാഷ്ട്ര തലത്തിൽ മനുഷ്യാവകാശ സംഘടനകൾ ഈ വിഷയത്തിൽ വലിയ പ്രതിഷേധം ഉയർത്തുന്നുണ്ട്.