*ബ്രിട്ടനെ നടുക്കി ഇറാന്റെ ‘ചാരക്കണ്ണുകൾ’; മാധ്യമത്തിന്റെ മറവിൽ ഭീകരർക്ക് ടാർഗറ്റ് ലിസ്റ്റ് നൽകുന്നതായി റിപ്പോർട്ട്!*

യുകെ : ബ്രിട്ടനിൽ ഇറാന്റെ ഔദ്യോഗിക വാർത്താ മാധ്യമമായ ‘പ്രസ് ടിവി’യുടെ മറവിൽ വൻ ചാരശൃംഖല പ്രവർത്തിക്കു
ന്നതായി ഞെട്ടിക്കുന്ന റിപ്പോർട്ട്. ലണ്ടൻ ആസ്ഥാനമായുള്ള ‘ദി ടെലിഗ്രാഫ്’ പുറത്തുവിട്ട വിവരങ്ങൾ പ്രകാരം, ഇറാന്റെ ഇന്റലിജൻസ് വിഭാഗം യുകെയിൽ വ്യാപകമായ പ്രചാരണങ്ങളും വിവരശേഖരണവും നടത്തുന്നുണ്ട്. ബ്രിട്ടനിലെ നിയമങ്ങളിലുള്ള അയവ് ഇറാൻ ഭരണകൂടം മുതലെടുക്കുന്നതായും ഇറാന്റെ വിമർശകർക്കും ജൂത സമൂഹത്തിനുമെതിരെ ഇവർ തയ്യാറാക്കുന്ന റിപ്പോർട്ടുകൾ ഭീകരർക്കുള്ള ‘ടാർഗറ്റ് ലിസ്റ്റ്’ ആയി മാറുന്നുണ്ടെന്നും വൃത്തങ്ങൾ സൂചിപ്പിക്കുന്നു.

2012-ൽ ബ്രിട്ടനിലെ ഓഫ്കോം പ്രസ് ടിവിയുടെ ലൈസൻസ് റദ്ദാക്കുകയും യൂട്യൂബ് ഇവരെ നിരോധിക്കുകയും ചെയ്തിരുന്നെങ്കിലും, സോഷ്യൽ മീഡിയ വഴി ഇവർ ഇപ്പോഴും സജീവമാണ്. പല ഇടതുപക്ഷ രാഷ്ട്രീയ നേതാക്കളും ആക്ടിവിസ്റ്റുകളും ഇവരുടെ പരിപാടികളിൽ പതിവായി പ്രത്യക്ഷപ്പെടാറുണ്ട്. ഈ ചാരശൃംഖലയുടെ പ്രവർത്തനം ബ്രിട്ടന്റെ ആഭ്യന്തര സുരക്ഷയ്ക്ക് വലിയ ഭീഷണിയാണെന്നാണ് വിലയിരുത്തപ്പെടുന്നത്. ഇറാൻ വിരുദ്ധ നിലപാടുള്ളവരെയും പ്രത്യേക സമുദായങ്ങളെയും നിരീക്ഷിക്കാൻ പ്രസ് ടിവി ഉപയോഗിക്കപ്പെടുന്നു എന്നത് ഗൗരവകരമായ സാഹചര്യമാണ് സൃഷ്ടിച്ചിരിക്കുന്നത്.