ടിം വാൾസിന്റെ ‘ആൻ ഫ്രാങ്ക്’ പരാമർശം വിവാദത്തിൽ; രൂക്ഷമായി വിമർശിച്ച് ഹോളോകോസ്റ്റ് മ്യൂസിയവും വൈറ്റ് ഹൗസും

യുഎസ് : അമേരിക്കൻ വൈസ് പ്രസിഡന്റ് സ്ഥാനാർത്ഥിയായിരുന്ന ടിം വാൾസ്, അനധികൃത കുടിയേറ്റക്കാർ നേരിടുന്ന പ്രതിസന്ധിയെ ആൻ ഫ്രാങ്കിന്റെ ജീവിതവുമായി താരതമ്യം ചെയ്തത് വലിയ പ്രതിഷേധങ്ങൾക്കിടയാക്കി. മിനിയാപൊളിസിലെ കുട്ടികൾ ഇമിഗ്രേഷൻ വിഭാഗത്തെ ഭയന്ന് വീടുകളിൽ ഒളിച്ചിരിക്കുകയാണെന്നും, ആൻ ഫ്രാങ്കിന്റെ കഥയ്ക്ക് സമാനമായ ഒരു പുസ്തകം ഭാവിയിൽ മിനസോട്ടയിലെ കുട്ടികളെക്കുറിച്ച് എഴുതപ്പെടുമെന്നുമാണ് അദ്ദേഹം പറഞ്ഞത്. എന്നാൽ ഈ പരാമർശത്തെ വാഷിംഗ്ടൺ ഡി.സി.യിലെ ഹോളോകോസ്റ്റ് മ്യൂസിയം രൂക്ഷമായി വിമർശിച്ചു. ജൂതവംശജ ആയതുകൊണ്ട് മാത്രം വധിക്കപ്പെട്ട ആൻ ഫ്രാങ്കിന്റെ അനുഭവത്തെ രാഷ്ട്രീയ ലക്ഷ്യങ്ങൾക്കായി മറ്റ് സാഹചര്യങ്ങളുമായി താരതമ്യം ചെയ്യുന്നത് ഒരിക്കലും അംഗീകരിക്കാനാവില്ലെന്നും അത് അങ്ങേയറ്റം അപമാനകരമാണെന്നും മ്യൂസിയം വ്യക്തമാക്കി.

വൈറ്റ് ഹൗസും ടിം വാൾസിന്റെ പ്രസ്താവനയ്ക്കെതിരെ കടുത്ത ഭാഷയിൽ പ്രതികരിച്ചിരുന്നു. അദ്ദേഹം അസ്ഥിരമായ മാനസികാവസ്ഥയുള്ള വ്യക്തിയാണെന്നായിരുന്നു വൈറ്റ് ഹൗസിന്റെ വിമർശനം. ഇതേത്തുടർന്ന് രാഷ്ട്രീയ അന്തരീക്ഷം വഷളായെങ്കിലും, പിന്നീട് ടിം വാൾസ് പ്രസിഡന്റ് ട്രംപുമായി ഫോണിൽ സംസാരിക്കുകയും നിലവിലെ പ്രശ്നങ്ങളിൽ ഒത്തൊരുമിച്ച് പ്രവർത്തിക്കാൻ ആഗ്രഹം പ്രകടിപ്പിക്കുകയും ചെയ്തു. ക്രമസമാധാന പാലനവും കുടിയേറ്റ നിയമങ്ങളും നടപ്പിലാക്കുമ്പോൾ അത് വംശഹത്യ പോലുള്ള ചരിത്ര സംഭവങ്ങളുമായി താരതമ്യം ചെയ്യുന്നത് ജൂത സമൂഹത്തെ വേദനിപ്പിക്കുന്നതാണെന്ന നിലപാടിൽ രാഷ്ട്രീയ നിരീക്ഷകർ ഇപ്പോഴും ഉറച്ചുനിൽക്കുന്നു.