*ഇംഗ്ലണ്ടിൽ കത്തോലിക്കാ-പെന്തക്കോസ്ത് വിഭാഗങ്ങൾ തമ്മിൽ ആദ്യ ഔദ്യോഗിക ചർച്ച; സ്വാഗതം ചെയ്ത് സി.ടി.ഇ*

ഇംഗ്ലണ്ട് : ഇംഗ്ലണ്ടിലെ കത്തോലിക്കാ സഭയും പെന്തക്കോസ്ത് പ്രസ്ഥാനവും തമ്മിൽ ചരിത്രത്തിലാദ്യമായി നടന്ന “ഔദ്യോഗിക” ഉഭയകക്ഷി ചർച്ചയെ ‘ചർച്ചസ് ടുഗെദർ ഇൻ ഇംഗ്ലണ്ട്’ സ്വാഗതം ചെയ്തു. ലണ്ടനിലെ എക്ലെസ്റ്റൺ സ്‌ക്വയറിലുള്ള കാത്തലിക് ബിഷപ്‌സ് കോൺഫറൻസ് ഓഫ് ഇംഗ്ലണ്ട് ആൻഡ് വെയിൽസ് ഓഫീസിൽ വെച്ച് കഴിഞ്ഞ മാർച്ചിലാണ് ഈ ചർച്ചയ്ക്ക് ഔദ്യോഗികമായി തുടക്കമായത്. പ്രാർത്ഥനയോടും സ്നേഹസംഭാഷണങ്ങളോടും കൂടി ആരംഭിച്ച യോഗത്തിൽ ഇരുവിഭാഗങ്ങളുടെയും പ്രതിനിധികൾ തങ്ങളുടെ ആത്മീയ അനുഭവങ്ങളും ദൈവശാസ്ത്രപരമായ കാഴ്ചപ്പാടുകളും പരസ്പരം പങ്കുവെച്ചു. തർക്കങ്ങൾക്കോ വാദപ്രതിവാദങ്ങൾക്കോ മുതിരാതെ, പരസ്പര ബഹുമാനത്തോടെയുള്ളതായിരുന്നു ഈ കൂടിക്കാഴ്ച.

ഇരുവിഭാഗങ്ങളും തമ്മിൽ യോജിച്ചു പോകാൻ കഴിയുന്ന മേഖലകളും ഭാവിയിലെ സഹകരണത്തിനുള്ള സാധ്യതകളും യോഗം വിലയിരുത്തി. അതോടൊപ്പം തന്നെ ഏറെ ശ്രദ്ധയോടെ കൈകാര്യം ചെയ്യേണ്ട ചില തന്ത്രപ്രധാനമായ വിഷയങ്ങളും ചർച്ചകളിൽ ഉയർന്നു വന്നു. പെന്തക്കോസ്ത്-ആംഗ്ലിക്കൻ സഭകൾ തമ്മിലുള്ള ബന്ധത്തിന്റെ വളർച്ചയെ ഒരു മാതൃകയായി സ്വീകരിച്ചുകൊണ്ട്, ഈ അന്തർ-സഭാ ചർച്ചകൾ എങ്ങനെ മുന്നോട്ട് കൊണ്ടുപോകാമെന്നും വിശുദ്ധ ഗ്രന്ഥത്തെ അടിസ്ഥാനമാക്കി പ്രതിനിധികൾ സംസാരിച്ചു. ഇംഗ്ലണ്ടിലെ സഭകളുടെ ഐക്യമുന്നേറ്റത്തിൽ ഇതൊരു സുപ്രധാന ചുവടുവെപ്പാണെന്ന് സി.ടി.ഇ (CTE) വിലയിരുത്തി. പരസ്പരം നന്നായി ശ്രവിക്കാൻ തയ്യാറായാൽ സഭകൾ തമ്മിലുള്ള ഐക്യം സാധ്യമാണെന്നതിന്റെ ശക്തമായ തെളിവാണ് ഈ യോഗമെന്നും അവർ കൂട്ടിച്ചേർത്തു.