വിശ്വാസത്തിന്റെ മറവിലെ ചൂഷണങ്ങൾ

പ്രാർത്ഥനാലയത്തോടനുബന്ധിച്ച് പ്രവർത്തിക്കുന്ന സ്ഥാപനത്തിൽ പ്രായപൂർത്തിയാകാത്ത കുട്ടികൾക്ക് നേരെ ക്രൂരമായ മർദനവും ചൂഷണവും നടന്നുവെന്ന വെളിപ്പെടുത്തലുകൾ ഞെട്ടിക്കുന്നതാണ്. സാമ്പത്തികമായി പിന്നോക്കം നിൽക്കുന്ന കുടുംബങ്ങളിൽ നിന്നുള്ള കുട്ടികൾക്ക് വിദ്യാഭ്യാസവും ജോലിയും വാഗ്ദാനം ചെയ്ത് കൊണ്ടുവരികയും, പിന്നീട് അവരെ ശാരീരികമായി പീഡിപ്പിക്കുകയും വേതനം നൽകാതെ ജോലി ചെയ്യിപ്പിക്കുകയും ചെയ്തുവെന്ന വിവരങ്ങൾ ബാലനീതി സമിതിയും സ്ഥിരീകരിച്ചിട്ടുണ്ട്. വിശ്വാസത്തിന്റെയും ജീവകാരുണ്യ പ്രവർത്തനത്തിന്റെയും മുഖംമൂടിയണിഞ്ഞ് നടക്കുന്ന ഇത്തരം നിയമവിരുദ്ധ പ്രവർത്തനങ്ങൾ ഒരിക്കലും അംഗീകരിക്കാനാവില്ല. അശരണർക്കും അനാഥർക്കും സ്നേഹവും തണലും നൽകേണ്ട ഒരു കേന്ദ്രം തന്നെ അവരുടെ കണ്ണീരിന് കാരണമാകുന്നത് ക്രിസ്തീയ മൂല്യങ്ങൾക്ക് നിരക്കുന്നതല്ല. ഒരു സ്ഥാപനമെന്ന നിലയിൽ സമൂഹത്തിന് മാതൃകയാകേണ്ടവർ തന്നെ ഇത്തരം കുറ്റകൃത്യങ്ങളിൽ ഏർപ്പെടുന്നത് ക്രൈസ്തവ സമൂഹത്തിന് ഒന്നാകെ അപമാനകരമാണ്. ഈ വിഷയത്തിൽ യാതൊരു വിട്ടുവീഴ്ചയുമില്ലാത്ത അന്വേഷണം നടക്കണം. കുറ്റക്കാർ എത്ര ഉന്നതരായാലും അവർക്കെതിരെ മുഖം നോക്കാതെ കർശന നിയമനടപടികൾ സ്വീകരിക്കണം

പ്രാർത്ഥിക്കാനുള്ള ഭരണഘടനാപരമായ അവകാശം

ഈ കുറ്റകൃത്യങ്ങളുടെ പശ്ചാത്തലത്തിൽ കഴിഞ്ഞ ഞായറാഴ്ച പ്രാർത്ഥനാലയത്തിന് മുന്നിലുണ്ടായ സംഘർഷാവസ്ഥ മറ്റൊരു സുപ്രധാന വിഷയം മുന്നോട്ടുവെക്കുന്നുണ്ട്. കുറ്റാരോപിതർക്കെതിരെ പ്രതിഷേധിക്കാനും നിയമനടപടി ആവശ്യപ്പെടാനും ഏവർക്കും അവകാശമുണ്ട്. എന്നാൽ, ആ പ്രതിഷേധം സാധാരണക്കാരായ വിശ്വാസികളുടെ ആരാധനാ സ്വാതന്ത്ര്യത്തെ ഹനിക്കുന്ന തരത്തിലേക്ക് മാറാൻ പാടില്ല.കുറ്റകൃത്യം ചെയ്തത് സ്ഥാപനത്തിന്റെ നടത്തിപ്പുകാരോ ജീവനക്കാരോ ആകാം; അതിന്റെ പേരിൽ ദൈവത്തെ ആരാധിക്കാൻ വരുന്ന നിരപരാധികളായ വിശ്വാസികളെ തടയുന്നത് ജനാധിപത്യ വിരുദ്ധമാണ്.പ്രാർത്ഥിക്കാനും ആരാധന നടത്താനുമുള്ള സ്വാതന്ത്ര്യം ഇന്ത്യയിലെ ഏതൊരു പൗരന്റെയും മൗലികാവകാശമാണ്. സ്ഥാപനത്തിനെതിരെയുള്ള ആരോപണങ്ങൾ അന്വേഷണ ഏജൻസികൾ നിയമപരമായി നേരിടണം. എന്നാൽ, പ്രതിഷേധത്തിന്റെ പേരിൽ പ്രാർത്ഥനാലയത്തിന്റെ വാതിലുകൾ വിശ്വാസികൾക്ക് മുന്നിൽ കൊട്ടിയടക്കാൻ ആർക്കും അധികാരമില്ല. പ്രശ്നത്തിൽ സമയബന്ധിതമായി ഇടപെട്ട്, ബൈബിളുമേന്തി പ്രാർത്ഥിക്കാനെത്തിയ വിശ്വാസികൾക്ക് അതിനുള്ള സൗകര്യം ഒരുക്കിക്കൊടുത്ത പോലീസിന്റെ നടപടി സ്വാഗതാർഹമാണ്.

വ്യക്തികൾ ചെയ്യുന്ന തെറ്റുകൾക്ക് ദൈവാലയങ്ങളെയോ വിശ്വാസി സമൂഹത്തെയോ ആകെ പ്രതിക്കൂട്ടിൽ നിർത്തുന്ന പ്രവണത ഒഴിവാക്കപ്പെടേണ്ടതാണ്.മുന്നോട്ടുള്ള വഴിഎലോഹിം സെന്ററുമായി ബന്ധപ്പെട്ട കേസിൽ സത്യസന്ധവും സുതാര്യവുമായ അന്വേഷണം നടപ്പാക്കണം. സ്ഥാപനത്തിലെ മുഴുവൻ അന്തേവാസികളുടെയും സുരക്ഷ സർക്കാരും ബന്ധപ്പെട്ട വകുപ്പുകളും ഉറപ്പുവരുത്തണം. അതോടൊപ്പം, വിശ്വാസത്തിന്റെ മറവിൽ ഇത്തരം ചൂഷണങ്ങൾ നടത്തുന്ന പ്രവണതകളെ സഭയും വിശ്വാസി സമൂഹവും തിരിച്ചറിയുകയും ഒറ്റപ്പെടുത്തുകയും വേണം.സ്ഥാപനങ്ങളുടെ കെടുകാര്യസ്ഥതയുടെയും ചില വ്യക്തികളുടെ വഴിവിട്ട പ്രവർത്തനങ്ങളുടെയും പേരിൽ വിശ്വാസികളുടെ പ്രാർത്ഥിക്കാനുള്ള അവകാശം ഹനിക്കപ്പെടാതിരിക്കാൻ പൊതുസമൂഹം ജാഗ്രത പുലർത്തേണ്ടതുണ്ട്. ഇരകളാക്കപ്പെട്ടവർക്ക് നീതിയും, വിശ്വാസികൾക്ക് സമാധാനത്തോടെ പ്രാർത്ഥിക്കാനുള്ള സാഹചര്യവും ഒരേസമയം ഉറപ്പാക്കുന്നതിലൂടെ മാത്രമേ ഈ പ്രതിസന്ധിക്ക് ആരോഗ്യകരമായ ഒരു പരിഹാരം കാണാനാകൂ. തെറ്റുകളെ തിരുത്താനും സത്യത്തെ മുറുകെപ്പിടിക്കാനും നമുക്ക് സാധിക്കണം.