ഓട്ടിസം ‘പിശാചിന്റെ’ പണിയാണോ? വൈദികന്റെ വാക്കുകൾ കേട്ട് ഞെട്ടി വിശ്വാസികൾ!

കോർക്ക് : കോർക്കിലെ ഒരു പള്ളിയിൽ നടന്ന കുർബാനയ്ക്കിടെ ഓട്ടിസത്തെക്കുറിച്ച് നടത്തിയ വിവാദപരമായ പരാമർശത്തിൽ കെറി രൂപത ഖേദം പ്രകടിപ്പിച്ചു. ഫെബ്രുവരിയിൽ കിസ്കീമിലെ ചർച്ച് ഓഫ് ദി സേക്രഡ് ഹാർട്ടിൽ വെച്ച് നടന്ന പ്രസംഗത്തിനിടെ സന്ദർശകനായി എത്തിയ വൈദികനാണ് ഓട്ടിസം ‘ദുരാത്മാക്കളുടെ പ്രവർത്തനം’ മൂലമാണെന്ന് പറഞ്ഞത്. ലിമെറിക്കിൽ നിന്നുള്ള ഫ്രാൻസിസ്കൻ ഫ്രയേഴ്സ് ഓഫ് ദ റിന്യൂവൽ അംഗമാണ് ഈ പ്രസംഗം നടത്തിയത്.

പ്രസംഗം കേട്ടുനിന്ന വിശ്വാസികൾ അങ്ങേയറ്റം അമ്പരപ്പോടെയും പ്രതിഷേധത്തോടെയുമാണ് പ്രതികരിച്ചത്. “ഇത്തരമൊരു കാര്യം ഒരു വൈദികൻ പറയുമെന്ന് വിശ്വസിക്കാൻ കഴിയുന്നില്ല, എല്ലാവരും ശരിക്കും ഞെട്ടിപ്പോയി,” എന്ന് സഭാംഗങ്ങളിൽ ഒരാൾ ഐറിഷ് ടൈംസിനോട് പ്രതികരിച്ചു. വിവാദമായതോടെ രൂപത ഉടൻ തന്നെ വിഷയത്തിൽ ഇടപെടുകയും പ്രസംഗത്തിലുണ്ടായ പരാമർശങ്ങളിൽ നിർവ്യാജം ഖേദിക്കുന്നുവെന്ന് ഔദ്യോഗികമായി അറിയിക്കുകയും ചെയ്തു.