*ലബനനിലെ സ്ഥിതി അതീവ ഗുരുതരം; ഇസ്രായേൽ-ഹിസ്ബുള്ള പോരാട്ടത്തിൽ ലോകനേതാക്കളുടെ ആശങ്ക*

ലെബനോൻ : ലബനനിലെ മാനുഷിക സാഹചര്യം “അതീവ ഭയാനകമാണെന്ന്” വിശേഷിപ്പിച്ചുകൊണ്ട് യൂറോപ്യൻ രാജ്യങ്ങൾ ഉൾപ്പെടെയുള്ള ലോകശക്തികൾ രംഗത്തെത്തി. ഇസ്രായേലും ഹിസ്ബുള്ളയും തമ്മിലുള്ള പോരാട്ടം ശക്തമായതോടെ വൻതോതിലുള്ള മാനുഷിക പ്രത്യാഘാതങ്ങൾ ഉണ്ടാകുമെന്ന് നേതാക്കൾ മുന്നറിയിപ്പ് നൽകി. ലബനനിലേക്ക് ഒരു കരസേനാ അധിനിവേശം ഉണ്ടാകാനുള്ള സാധ്യതയെക്കുറിച്ച് അന്താരാഷ്ട്ര സമൂഹം വലിയ ആശങ്കയാണ് രേഖപ്പെടുത്തുന്നത്. സമാധാന ശ്രമങ്ങൾ അടിയന്തരമായി ആരംഭിക്കണമെന്നും അവർ ആവശ്യപ്പെട്ടു.

കാനഡ, ഫ്രാൻസ്, ജർമ്മനി, ഇറ്റലി, യുണൈറ്റഡ് കിംഗ്ഡം എന്നീ രാജ്യങ്ങളിലെ നേതാക്കൾ ബുധനാഴ്ച സംയുക്ത പ്രസ്താവന പുറത്തിറക്കി. ലബനനിൽ വർദ്ധിച്ചുവരുന്ന അക്രമങ്ങളിൽ തങ്ങൾ അസ്വസ്ഥരാണെന്ന് പ്രസ്താവനയിൽ വ്യക്തമാക്കുന്നു. ഇസ്രായേലും ലബനനും തമ്മിൽ ചർച്ചകൾ നടത്തി സുസ്ഥിരമായ ഒരു രാഷ്ട്രീയ പരിഹാരത്തിൽ എത്തണമെന്ന് നേതാക്കൾ അഭ്യർത്ഥിച്ചു. യുദ്ധം പടരുന്നത് മേഖലയിലെ ലക്ഷക്കണക്കിന് സാധാരണക്കാരുടെ ജീവിതത്തെ ബാധിക്കുമെന്നും അവർ ചൂണ്ടിക്കാട്ടി.