“പാസ്റ്റർ വേണ്ട, എഐ മതി!”; അമേരിക്കൻ ക്രൈസ്തവർക്കിടയിൽ പുതിയ തരംഗം

അമേരിക്ക : ആത്മീയ ഉപദേശങ്ങൾ തേടുന്ന കാര്യത്തിൽ അമേരിക്കൻ ക്രൈസ്തവർക്കിടയിൽ ആർട്ടിഫിഷ്യൽ ഇന്റലിജൻസിന് വലിയ സ്വീകാര്യത ലഭിക്കുന്നതായി പുതിയ പഠനം. പ്രശസ്ത ഗവേഷണ ഏജൻസിയായ ബാർണ ഗ്രൂപ്പ് നടത്തിയ സർവ്വേയിലാണ് മൂന്നിലൊന്ന് വിശ്വാസികളും ഒരു പാസ്റ്റർ നൽകുന്നതിന് തുല്യമായ വിശ്വാസ്യത എഐക്കും നൽകുന്നതായി കണ്ടെത്തിയത്. യുവതലമുറയിലാണ് ഈ പ്രവണത ഏറ്റവും ശക്തമായി കാണപ്പെടുന്നത്.

2025 നവംബറിൽ 1,514 മുതിർന്ന വ്യക്തികളിൽ നടത്തിയ പഠനമനുസരിച്ച് 30% ആളുകളും എഐ നൽകുന്ന ആത്മീയ ഉപദേശങ്ങൾ വിശ്വസനീയമാണെന്ന് കരുതുന്നു. ഇതിൽ ജനറേഷൻ ഇസഡ്, മില്ലേനിയൽസ് എന്നിവർക്കിടയിൽ ഈ ശതമാനം 40 വരെ ഉയരുന്നുണ്ട്. സജീവമായി ആരാധനകളിൽ പങ്കെടുക്കുന്നവർക്കിടയിൽ 34% പേർ എഐയെ പിന്തുണയ്ക്കുന്നു.

ദൈനംദിന ആത്മീയ ജീവിതത്തിൽ സാങ്കേതികവിദ്യ വലിയ രീതിയിൽ സ്വാധീനം ചെലുത്തുന്നു എന്നാണ് ഈ കണക്കുകൾ സൂചിപ്പിക്കുന്നത്. ടെന്നസിയിൽ നടന്ന അന്താരാഷ്ട്ര ക്രിസ്ത്യൻ മീഡിയ കൺവെൻഷനിലാണ് ഈ റിപ്പോർട്ട് പുറത്തുവിട്ടത്. ആത്മീയ കാര്യങ്ങളിൽ യന്ത്രമനുഷ്യന്റെ ഉപദേശം തേടുന്നതിലെ ധാർമ്മികതയെക്കുറിച്ചുള്ള പുതിയ ചർച്ചകൾക്ക് ഈ റിപ്പോർട്ട് തുടക്കമിട്ടിരിക്കുകയാണ്.