സ്പ്രിംഗ്ഫീൽഡ് പള്ളിയിൽ ആയിരങ്ങൾ ഒത്തുചേർന്നു: ഹെയ്തിയൻ അഭയാർത്ഥികൾക്കായി പ്രാർത്ഥന*

യുഎസ് : അമേരിക്കയിലെ ഹെയ്തിയൻ കുടിയേറ്റക്കാർക്കുള്ള നാടുകടത്തൽ സംരക്ഷണ കാലാവധി അവസാനിക്കാൻ മണിക്കൂറുകൾ ബാക്കിനിൽക്കെ, ഒഹായോയിലെ സ്പ്രിംഗ്ഫീൽഡിൽ വൻ ജനമുന്നേറ്റം. സെന്റ് ജോൺ മിഷണറി ബാപ്റ്റിസ്റ്റ് ചർച്ചിൽ തിങ്കളാഴ്ച രാവിലെ നടന്ന പ്രത്യേക പ്രാർത്ഥനയിലും ആരാധനയിലും പങ്കെടുക്കാൻ ആയിരക്കണക്കിന് ആളുകളാണ് ഒത്തുചേർന്നത്. 3,00,000-ത്തിലധികം ഹെയ്തിയൻ കുടിയേറ്റക്കാരുടെ ഭാവി അനിശ്ചിതത്വത്തിലായ സാഹചര്യത്തിലാണ് ഈ വിശ്വാസ സംഗമം നടന്നത്.

തിരക്ക് നിയന്ത്രിക്കാനാവാതെ വന്നതോടെ ഫയർഫോഴ്സ് ഉദ്യോഗസ്ഥർ ഇടപെട്ട് ആരാധന താൽക്കാലികമായി തടഞ്ഞു. പള്ളിക്കുള്ളിൽ ഉൾക്കൊള്ളാവുന്നതിലധികം ആളുകൾ കയറിയതിനാൽ സുരക്ഷാ കാരണങ്ങളാൽ 150 സന്നദ്ധപ്രവർത്തകർ പുറത്തുപോയാൽ മാത്രമേ ആരാധന തുടരാനാകൂ എന്ന് അധികൃതർ അറിയിച്ചു. ഫ്ലോറിഡയിൽ നിന്നും വാഷിംഗ്ടൺ ഡി.സിയിൽ നിന്നും പോലും ആളുകൾ ഈ ശുശ്രൂഷയിൽ പങ്കുചേരാൻ എത്തിയിരുന്നു എന്നത് ശ്രദ്ധേയമാണ്.

മഞ്ഞുവീഴ്ചയും കൊടുംതണുപ്പും അവഗണിച്ചാണ് വിശ്വാസികൾ പള്ളിയിലേക്ക് എത്തിയത്. ആരാധനാലയത്തിന്റെ അകത്തളങ്ങളും വരാന്തകളും കടന്ന് ജനക്കൂട്ടം തെരുവുകളിലേക്ക് നീണ്ടു. നാടുകടത്തൽ ഭീഷണി നേരിടുന്നവർക്ക് ഐക്യദാർഢ്യം പ്രഖ്യാപിച്ച് പ്ലക്കാർഡുകൾ ഏന്തിയും പ്രാർത്ഥനാ ഗീതങ്ങൾ ആലപിച്ചും അവർ തങ്ങളുടെ പ്രതിഷേധവും വിശ്വാസവും പ്രകടമാക്കി. സഭയുടെയും വിശ്വാസികളുടെയും വലിയൊരു കൂട്ടായ്മയ്ക്കാണ് സ്പ്രിംഗ്ഫീൽഡ് സാക്ഷ്യം വഹിച്ചത്.