ദൈവത്തോട് അടുപ്പം ഉണ്ടാക്കാനുള്ള മാർഗം

ഇവാ. സജു മാത്യു പരുമല

എനോശിന്റെ ജീവിതത്തിൽ നിന്ന് ആധുനിക തലമുറയ്ക്ക് ലഭിക്കുന്ന അഞ്ചു പാഠങ്ങൾ

1. ദൈവത്തെ വിളിക്കാൻ തുടങ്ങിയത് – ആരാധനയുടെ പുനരാരംഭം

എനോശിന്റെ കാലത്ത് “മനുഷ്യർ യഹോവയുടെ നാമം വിളിച്ചു തുടങ്ങുകയുണ്ടായി” (ഉല്പത്തി 4:26). അത് ദൈവാരാധനയുടെ പുനരുജ്ജീവനത്തിന്റെ തുടക്കം ആയിരുന്നു. ഇന്ന് സാങ്കേതിക ലോകത്തിൽ ജീവിക്കുന്ന നമുക്ക് ദൈവത്തോടുള്ള ബന്ധം പുനരാരംഭിക്കാനും നമുടെ ജീവിതത്തിൽ അവനെ മുൻ‌തൂക്കം നൽകാനും ഇത്‌ ഓർമ്മപ്പെടുത്തുന്നു.

2. വിശ്വാസത്തിന്റെ പാരമ്പര്യം കൈമാറുക

എനോശ് തന്റെ പിതാവായ ശേത്തിൽ നിന്ന് വിശ്വാസത്തിന്റെ പാത ഏറ്റെടുത്തു. അവന്റെ ജീവിതം പിതൃവിശ്വാസം തുടർന്നത് ആയിരുന്നു. നമ്മുടെ കാലത്ത് മാതാപിതാക്കളിൽ നിന്നുള്ള ആത്മീയ മൂല്യങ്ങൾ ഉൾകൊള്ളുകയും അത് അടുത്ത തലമുറയ്ക്കും കൈമാറുകയും ചെയ്യേണ്ടത് അത്യന്തം പ്രധാനമാണ്.

3. ദൈവബോധത്തോടെ ജീവിക്കുക

“എനോശ്” എന്ന പദം മനുഷ്യന്റെ നിസ്സാരതയെയും ദൗർബല്യത്തെയും സൂചിപ്പിക്കുന്നു. അവൻ തന്റെ പരിമിതികളറിയുന്നവനായിരുന്നു. ഇത് നമ്മെ ഓർമ്മിപ്പിക്കുന്നത്, മനുഷ്യ ബുദ്ധി, സമ്പത്ത്, ടെക്‌നോളജി എന്നിവയെക്കാൾ ദൈവത്തിൽ ആശ്രയിക്കേണ്ടതിന്റെ ആവശ്യകതയാണ്.

4. പ്രാർത്ഥനയുടെ മൂല്യം തിരിച്ചറിയുക

എനോശിന്റെ കാലത്ത് തന്നെ ആളുകൾ ദൈവത്തോടു സംസാരിക്കാൻ തുടങ്ങി.
ദൈവത്തോട് അടുപ്പം ഉണ്ടാക്കാനുള്ള മാർഗം പ്രാർത്ഥനയാണ്. ഇന്ന് തിരക്കുപിടിച്ച ജീവിതത്തിൽ പ്രാർത്ഥനയെ അവഗണിക്കാതെ, ദിവസവും ദൈവത്തോടു സംസാരിക്കേണ്ടത് അത്യാവശ്യമാണ്.

5. ദൈവത്തിലേക്ക് സമൂഹത്തെ നയിക്കുക

എനോശിന്റെ കാലത്ത് ഒരു സമൂഹം ദൈവത്തെ തേടാൻ തുടങ്ങിയത് അവന്റെ തലമുറയുടെ ആത്മീയ ഉണർവിനുള്ള അടയാളമായിരുന്നു.
ഒരു വ്യക്തിയുടെ ദൈവഭക്തി ഒരു തലമുറയെ സ്വാധീനിക്കാനാകുമെന്നതിന് അവൻ തെളിവാണ്. ഇന്ന് നമുക്ക് ചുറ്റുമുള്ളവർ ദൈവത്തെ തിരിച്ചറിയാൻ പ്രചോദനമാകുന്ന ജീവിതം നയിക്കാൻ നമുക്ക് കഴിയണം.