30 വർഷത്തെ ഇടവേളയ്ക്ക് ശേഷം പള്ളിയിൽ തിരിച്ചെത്തി; കമ്മ്യൂണിറ്റിയുടെ മൂല്യം തിരിച്ചറിഞ്ഞെന്ന് ഇലോൺ മസ്ക്

സാൻ ഫ്രാൻസിസ്കോ: ടെസ്‌ല, സ്പേസ് എക്‌സ് തുടങ്ങിയ സ്ഥാപനങ്ങളുടെ തലവനും ലോകത്തിലെ മുൻനിര സാങ്കേതിക വിദഗ്ധനുമായ ഇലോൺ മസ്‌ക് 30 വർഷത്തെ ഇടവേളയ്ക്ക് ശേഷം താൻ വീണ്ടും പള്ളിയിൽ പോയി തുടങ്ങിയതിൻ്റെ കാരണം വെളിപ്പെടുത്തി. ഇത് മതപരമായ ഒരു നാടകീയ പരിവർത്തനമല്ല മറിച്ച് സാങ്കേതികവിദ്യയ്ക്ക് നൽകാൻ കഴിയാത്ത മനുഷ്യബന്ധങ്ങളുടെയും കൂട്ടായ്മയുടെയും മൂല്യം തിരിച്ചറിഞ്ഞതിൻ്റെ ഫലമാണെന്നാണ് അദ്ദേഹത്തിന്റെ വിശദീകരണം.

ഒരു ചെറിയ പട്ടണത്തിൽ എത്തിയപ്പോൾ യാദൃശ്ചികമായി ഒരു പള്ളിയിൽ കയറേണ്ടി വന്ന അനുഭവമാണ് തൻ്റെ കാഴ്ചപ്പാടുകൾ മാറ്റിയതെന്ന് അദ്ദേഹം പറയുന്നു. പ്രായഭേദമന്യേയുള്ള ആളുകൾ (20 വയസ്സുള്ളവരും 80 വയസ്സുള്ളവരും) ഒരുമിച്ച് കൂടുന്നതും പരസ്പരം പരിചരിക്കുന്നതും കണ്ടപ്പോൾ താൻ അത്ഭുതപ്പെട്ടുവെന്നും ഇന്നത്തെ സമൂഹം പ്രായമനുസരിച്ച് വേർതിരിക്കപ്പെടുകയും ആളുകൾ മൊബൈൽ/ഡിജിറ്റൽ ലോകത്തേക്ക് മാറുകയും ചെയ്തതോടെ ഇത്തരം തുടർച്ചയായ ബന്ധങ്ങൾ നഷ്ടമായെന്നും അദ്ദേഹം ചൂണ്ടിക്കാട്ടി.