തൊപ്പിയിൽ ബൈബിൾ വാക്യങ്ങളെഴുതിയ കളിക്കാർക്കെതിരെ നടപടിയില്ലെന്ന് എം.എൽ.ബി

ന്യൂയോർക്ക് : എൽ.ജി.ബി.ടി പ്രൈഡ് നൈറ്റ് മത്സരത്തിനിടെ തങ്ങളുടെ തൊപ്പികളിൽ ബൈബിൾ വാക്യങ്ങൾ എഴുതിയ സാൻ ഫ്രാൻസിസ്കോ ജയന്റ്സ് ടീമിലെ ക്രൈസ്തവ കളിക്കാർക്കെതിരെ അച്ചടക്ക നടപടിയുണ്ടാകില്ലെന്ന് മേജർ ലീഗ് ബേസ്ബോൾ കമ്മീഷണർ റോബ് മാൻഫ്രെഡ് വ്യക്തമാക്കി. യു.എസ് സെനറ്റർ ജോഷ് ഹാവ്‌ലിക്ക് അയച്ച കത്തിലാണ് അദ്ദേഹം ഇക്കാര്യം അറിയിച്ചത്.

യൂണിഫോമിൽ വ്യക്തിപരമായ സന്ദേശങ്ങൾ ചേർക്കരുതെന്ന ലീഗിന്റെ പൊതുവായ ചട്ടം ലംഘിച്ചതിനാണ് കളിക്കാർക്ക് സാധാരണ രീതിയിലുള്ള വാക്കാലുള്ള മുന്നറിയിപ്പ് നൽകിയത്. ഇത് ക്രൈസ്തവ വിശ്വാസത്തോടുള്ള വിരോധം മൂലമല്ലെന്നും, കായികതാരങ്ങൾക്ക് അവരുടെ മതപരമായ വിശ്വാസങ്ങൾ പ്രകടിപ്പിക്കാനുള്ള അവകാശത്തെ ലീഗ് പൂർണ്ണമായി മാനിക്കുന്നുണ്ടെന്നും കമ്മീഷണർ വിശദീകരിച്ചു.

കളിക്കാർക്ക് അവരുടെ വിശ്വാസത്തിന് വിരുദ്ധമായ ആഘോഷങ്ങളിൽ നേരിട്ട് പങ്കാളികളാകാൻ നിർബന്ധിക്കില്ലെന്ന് എം.എൽ.ബി ഉറപ്പുനൽകി. കായികരംഗത്ത് ക്രൈസ്തവ മൂല്യങ്ങൾ ഉയർത്തിപ്പിടിക്കുന്ന കളിക്കാർക്കെതിരെ വിവേചനം ഉണ്ടാകരുതെന്ന ശക്തമായ ആവശ്യവുമായി രാഷ്ട്രീയ-സാമൂഹ്യ വൃത്തങ്ങൾ രംഗത്തുവന്ന പശ്ചാത്തലത്തിലാണ് ഈ അനുകൂല തീരുമാനം.