*യുകെയിൽ ക്രിസ്തീയ മാധ്യമ സമ്മേളനം ‘റിവൈവ് 2026’ സമാപിച്ചു; എഐ വെല്ലുവിളികൾ ചർച്ചയായി*

യുകെ : ആർട്ടിഫിഷ്യൽ ഇന്റലിജൻസ് (AI), വ്യാജവാർത്തകൾ, സാംസ്കാരിക ഭിന്നതകൾ എന്നിവ വർദ്ധിച്ചുവരുന്ന ആധുനിക കാലഘട്ടത്തിൽ ക്രിസ്തീയ മാധ്യമപ്രവർത്തനത്തിന്റെ ഭാവി ചർച്ച ചെയ്യുന്നതിനായി മാധ്യമപ്രവർത്തകരുടെയും ഡിജിറ്റൽ കമ്മ്യൂണിക്കേറ്റർമാരുടെയും സമ്മേളനം ‘റിവൈവ് 2026’ലണ്ടനിൽ നടന്നു. ക്രിസ്ത്യൻ ബ്രോഡ്കാസ്റ്റിംഗ് കൗൺസിലിന്റെ (CBC) 40-ാം വാർഷികത്തോടനുബന്ധിച്ച് പ്രീമിയർ ക്രിസ്ത്യൻ റേഡിയോയുടെ പുതിയ ആസ്ഥാനത്താണ് സമ്മേളനം സംഘടിപ്പിച്ചത്.

സമ്മേളനത്തിൽ ഓക്സ്ഫോർഡ് പ്രൊഫസർ ജോൺ ലെനോക്സ് എഐയുടെ സ്വാധീനത്തെക്കുറിച്ച് പ്രമുഖ ബ്രോഡ്കാസ്റ്റർ ജസ്റ്റിൻ ബ്രിയർലിയുമായി സംവദിച്ചു. വൈദ്യശാസ്ത്രം, ബൈബിൾ വിവർത്തനം എന്നിവയിൽ എഐ വലിയ സഹായമാണെങ്കിലും, ഇത് മനുഷ്യനെ അലസരാക്കുമെന്നും ചിന്താശേഷിയെ ബാധിക്കുമെന്നും അദ്ദേഹം മുന്നറിയിപ്പ് നൽകി. ഡീപ്പ്ഫേക്കുകളും വ്യാജവിവരങ്ങളും തിരിച്ചറിയാൻ മാധ്യമപ്രവർത്തകർ കൂടുതൽ ജാഗ്രത പാലിക്കണമെന്ന് അദ്ദേഹം ഓർമ്മിപ്പിച്ചു. മറ്റൊരു മുഖ്യപ്രഭാഷകനായ ജേഴ്സി റോഡ് കമ്മ്യൂണിക്കേഷൻസ് സിഇഒ ഗാരെത് റസ്സൽ, മുഖ്യധാരാ മാധ്യമങ്ങൾ ക്രിസ്തീയ വിശ്വാസത്തെ പലപ്പോഴും തെറ്റായ രീതിയിലാണ് ചിത്രീകരിക്കുന്നതെന്ന് ചൂണ്ടിക്കാണിച്ചു. യുവാക്കൾ വിശ്വാസത്തിലേക്ക് മടങ്ങിവരുന്ന യാഥാർത്ഥ്യം മാധ്യമങ്ങൾ മറച്ചുവെക്കുകയാണെന്നും, വ്യക്തിപരമായ സാക്ഷ്യങ്ങളിലൂടെയും സാമൂഹിക നന്മകളിലൂടെയും സഭകൾ മാധ്യമങ്ങളുമായി കൂടുതൽ സജീവമായി ഇടപെടണമെന്നും അദ്ദേഹം ആവശ്യപ്പെട്ടു.