‘ഹൗസ് ഓഫ് ഡേവിഡ്’ മൂന്നാം സീസണിലേക്ക്; ആഗോളതലത്തിൽ 40 മില്യൺ പ്രേക്ഷകർ

ലോണ്ടൻ : ആമസോൺ പ്രൈം വീഡിയോയുടെ പ്രമുഖ ബിബ്ലിക്കൽ ഡ്രാമ സീരീസായ ‘ഹൗസ് ഓഫ് ഡേവിഡ്’ മൂന്നാം സീസണിലേക്ക് പുതുക്കി. വണ്ടർ പ്രൊജക്റ്റും ആമസോൺ എംജിഎം സ്റ്റുഡിയോസും സംയുക്തമായി നിർമ്മിച്ച ഈ പരമ്പര ഇതിനോടകം ആഗോളതലത്തിൽ 40 മില്യണിലധികം പ്രേക്ഷകരെ ആകർഷിച്ചതായി അധികൃതർ ഔദ്യോഗികമായി പ്രഖ്യാപിച്ചു.

ബൈബിളിലെ ദാവീദ് രാജാവിന്റെ ജീവിതത്തെ ആസ്പദമാക്കിയുള്ളതാണ് ഈ സീരീസ്. വരാനിരിക്കുന്ന മൂന്നാം സീസൺ, ദാവീദ് ഇസ്രായേലിന്റെ സിംഹാസനത്തിൽ ഏറുന്നതിന് മുൻപ് ഒരു നാടുകടത്തപ്പെട്ട ഇടയനിൽ നിന്നും ശക്തനായ യോദ്ധാവായി മാറുന്ന പ്രവാസകാലത്തെ അതിജീവനത്തെയും ആത്മീയ പോരാട്ടങ്ങളെയും കുറിച്ചുള്ളതായിരിക്കും.

ക്രൈസ്തവ മൂല്യങ്ങളിലും ബൈബിൾ വചനങ്ങളിലും അധിഷ്ഠിതമായ ഇത്തരം കുടുംബചിത്രങ്ങൾക്ക് ആഗോള വിപണിയിൽ വലിയ സ്വീകാര്യതയുണ്ടെന്ന് അണിയറപ്രവർത്തകർ വ്യക്തമാക്കുന്നു. ദാവീദായി വേഷമിട്ട പ്രധാന നടൻ മൈക്കൽ ഇസ്‌കന്ദർ കഴിഞ്ഞ വർഷം കത്തോലിക്കാ വിശ്വാസം സ്വീകരിച്ച വ്യക്തിയാണെന്നതും ഈ സീരീസിന്റെ ആത്മീയ ആധികാരികതയ്ക്ക് മാറ്റുകൂട്ടുന്നു.