*ക്യൂബയ്ക്കായി പ്രാർത്ഥനാ ദിനം ആചരിച്ച് ക്യൂബൻ ക്രൈസ്തവ സമൂഹം*

ഹവാന: ക്യൂബയ്ക്കകത്തുള്ളവരും പ്രവാസികളുമായ ആയിരക്കണക്കിന് വിശ്വാസികൾ ഒത്തുചേർന്ന് ശനിയാഴ്ച രാജ്യത്തിന്റെ വിടുതലിനും ആത്മീയ സ്വാതന്ത്ര്യത്തിനുമായി പ്രത്യേക പ്രാർത്ഥനാ ദിനം ആചരിച്ചു. മാർട്ടി ന്യൂസ് (Marti Noticias) റിപ്പോർട്ട് ചെയ്തത് അനുസരിച്ച്, കടുത്ത പോലീസ് നിരീക്ഷണത്തിനും സഭാ നേതാക്കൾക്ക് നേരെ വർദ്ധിച്ചുവരുന്ന ഉപദ്രവങ്ങൾക്കും നടുവിലാണ് ഈ വലിയ പ്രാർത്ഥനാ മുന്നേറ്റം നടന്നത്.

രാജ്യത്തെ നിലവിലെ സാമൂഹിക, രാഷ്ട്രീയ വെല്ലുവിളികൾക്കിടയിൽ ക്യൂബൻ ജനതയുടെ ആത്മീയ വിടുതലിനായി ദൈവത്തോട് നിലവിളിക്കുക എന്നതായിരുന്നു പ്രാർത്ഥനാ ആഹ്വാനത്തിന്റെ ലക്ഷ്യം. ആക്ടിവിസ്റ്റായ ഡേവിഡ് എസ്പിനോസ (David Espinosa) തന്റെ വീടിന് മുന്നിൽ ശക്തമായ പോലീസ് നിരീക്ഷണം ഏർപ്പെടുത്തിയതായി വെളിപ്പെടുത്തി.

തന്റെ മകൾ സഭാ പരിപാടിയിൽ പങ്കെടുക്കാൻ പുറപ്പെട്ടതിന് തൊട്ടുപിന്നാലെയാണ് പോലീസും സുരക്ഷാ ഉദ്യോഗസ്ഥരും വീടിന് ചുറ്റും നിലയുറപ്പിച്ചതെന്ന് അദ്ദേഹം പറഞ്ഞു. “ഞങ്ങൾ പ്രാർത്ഥിക്കാൻ മാത്രമാണ് ആഹ്വാനം ചെയ്തത്, എന്നാൽ അധികൃതർ ഭയപ്പെട്ടിരിക്കുകയാണ്,” എന്ന് വ്യക്തമാക്കിയ അദ്ദേഹം, എല്ലാ തടസ്സങ്ങൾക്കിടയിലും തന്റെ വീട്ടിലിരുന്ന് തന്നെ പ്രാർത്ഥന തുടരുമെന്ന് പ്രഖ്യാപിച്ചു.