പലസ്തീനിലെ ഏക ക്രൈസ്തവ ഗ്രാമമായ ദൈവബെ അതിക്രമങ്ങൾക്കിടയിലും അതിജീവനം തുടരുന്നു

പലസ്തീൻ : റാമല്ലയ്ക്ക് സമീപമുള്ള ദൈവബെ ഗ്രാമം വെസ്റ്റ് ബാങ്കിലെ ഒരേയൊരു സമ്പൂർണ്ണ ക്രൈസ്തവ ഗ്രാമമായി ഇന്നും നിലകൊള്ളുന്നു. ബൈബിളിൽ പരാമർശിച്ചിട്ടുള്ള ‘എഫ്രായീം’ എന്ന ചരിത്രപ്രസിദ്ധമായ ഈ പ്രദേശം, കനാനായ കാലഘട്ടം മുതൽ ആരംഭിക്കുന്ന പുരാതന ക്രൈസ്തവ പാരമ്പര്യത്തിന്റെ ജീവിക്കുന്ന അടയാളമാണ്.

ഗ്രീക്ക് ഓർത്തഡോക്സ്, ഗ്രീക്ക് കാത്തോലിക്, ലാറ്റിൻ വിഭാഗങ്ങളിൽപ്പെട്ട വിരലിലെണ്ണാവുന്ന കുടുംബങ്ങളാണ് നിലവിൽ ഇവിടെ വസിക്കുന്നത്. 2023 ഒക്ടോബർ 7-ന് ശേഷം പ്രദേശത്ത് കുടിയേറ്റക്കാരുടെയും സൈന്യത്തിന്റെയും ആക്രമണങ്ങൾ കടുത്തതായി ഗ്രാമത്തലവൻ സുലൈമാൻ ഖൂറിയും ഇടവക വികാരി ഫാ. ബഷാർ ഫവാദ്ലെയും ചൂണ്ടിക്കാട്ടുന്നു.

നിരന്തരമായ ഭീഷണിയും ഭൂമി കണ്ടുകെട്ടലും കാരണം ആളുകൾ കൂട്ടത്തോടെ ഇവിടം ഉപേക്ഷിച്ചു പോകാൻ നിർബന്ധിതരാകുന്നു. ജനസംഖ്യയുടെ 80 ശതമാനത്തോളം ആളുകളും വിദേശരാജ്യങ്ങളിലേക്ക് കുടിയേറിക്കഴിഞ്ഞു. എങ്കിലും, ഏത് പ്രതിസന്ധിയിലും തങ്ങളുടെ മാതൃഭൂമിയും ക്രൈസ്തവ വിശ്വാസവും കൈവിടാതെ ഇവിടെത്തന്നെ തുടരുമെന്ന് അവശേഷിക്കുന്ന ഗ്രാമവാസികൾ ഉറപ്പിച്ചുപറയുന്നു.