സൗത്ത് സുഡാനിൽ മതപരിവർത്തനത്തെച്ചൊല്ലി തർക്കം; പാസ്റ്ററെ തടവിലാക്കി, അഭയാർത്ഥി യുവതിക്ക് വധഭീഷണി

സൗത്ത് സുഡാൻ :സൗത്ത് സുഡാനിലെ അജുവാങ് തോക്ക് അഭയാർത്ഥി ക്യാമ്പിൽ ക്രിസ്തുമതം സ്വീകരിച്ച 18 വയസ്സുകാരിയായ അമോണ ഇബ്രാഹിം കാക്കിയെ കുടുംബം വീട്ടിൽ നിന്ന് പുറത്താക്കി. ഇതിന് പിന്നാലെ, യുവതിയെ തട്ടിക്കൊണ്ടുപോയി എന്ന് ആരോപിച്ച് ഗ്ലോറി ബാപ്റ്റിസ്റ്റ് ചർച്ച് പാസ്റ്ററായ ജോസഫ് ഷാവിഷിനെ പെൺകുട്ടിയുടെ സഹോദരൻ ഹസൻ ഇബ്രാഹിം കാക്കി പോലീസിൽ ഏൽപ്പിച്ചു. ജനുവരി 20 മുതൽ പോലീസ് കസ്റ്റഡിയിലുള്ള പാസ്റ്റർക്കെതിരെ ഇതുവരെ ഔദ്യോഗികമായി കുറ്റങ്ങളൊന്നും ചുമത്തിയിട്ടില്ല.

സുഡാനിലെ നുബ പർവതനിരകളിൽ നിന്നുള്ള അഭയാർത്ഥി കുടുംബത്തിലെ അംഗമായ അമോണ, കഴിഞ്ഞ രണ്ട് വർഷമായി രഹസ്യമായി ബൈബിൾ വായിക്കുകയും ഡിസംബറിൽ ക്രിസ്തുമതം സ്വീകരിക്കുകയുമായിരുന്നു. വിവരമറിഞ്ഞ കുടുംബം ജനുവരി 8-ന് അമോണയെ ക്രൂരമായി വീട്ടിൽ നിന്ന് പുറത്താക്കി. ജീവന് ഭീഷണിയുള്ളതിനാൽ ക്യാമ്പിന് പുറത്തുള്ള ഒരു സഭാ നേതാവിന്റെ വീട്ടിലാണ് ഇപ്പോൾ യുവതി അഭയം തേടിയിരിക്കുന്നത്. തന്റെ മതം മാറ്റത്തിന് പിന്നിൽ പാസ്റ്ററാണെന്നും അതിനാൽ അദ്ദേഹത്തെ മോചിപ്പിക്കില്ലെന്നുമാണ് പെൺകുട്ടിയുടെ വീട്ടുകാരുടെ നിലപാട്.

യുവതിയെ തിരികെ വിട്ടുനൽകണമെന്ന് കുടുംബം പള്ളിയോട് ആവശ്യപ്പെട്ടെങ്കിലും സഭാ അധികൃതർ അത് നിരസിച്ചു. പെൺകുട്ടി വീട്ടിലേക്ക് മടങ്ങിയാൽ വലിയ തോതിലുള്ള അക്രമങ്ങൾ നേരിടേണ്ടി വരുമെന്നും ജീവൻ പോലും അപകടത്തിലാകുമെന്നും സഭാ നേതാക്കൾ ആശങ്കപ്പെടുന്നു. താൻ വീട്ടിലേക്ക് മടങ്ങിയാൽ കൊല്ലപ്പെട്ടേക്കുമെന്ന് അമോണയും ഭയപ്പെടുന്നു. ഈ വിഷയത്തിൽ കൂടുതൽ ചർച്ചകൾ നടക്കുന്നുണ്ടെങ്കിലും പാസ്റ്ററുടെ മോചനവും പെൺകുട്ടിയുടെ സുരക്ഷയും ഇപ്പോഴും അനിശ്ചിതത്വത്തിലാണ്.