ദൈവവിശ്വാസം: ജർമ്മനിയിൽ ബൈബിൾ ടിവിയുടെ 30,000 പോസ്റ്റർ കാമ്പെയ്‌ൻ

ബെർലിൻ: ദൈവത്തെക്കുറിച്ചും വിശ്വാസത്തെക്കുറിച്ചും പൊതുജനങ്ങളിൽ ചിന്ത ഉണർത്തുന്നതിനായി ജർമ്മൻ ക്രിസ്ത്യൻ മീഡിയ ബ്രോഡ്കാസ്റ്ററായ ബൈബിൾ ടിവി ദേശീയതലത്തിൽ ഡൈ എറിന്നറുങ് 2026 എന്ന പേരിൽ പുതിയൊരു പ്രചാരണ പരിപാടിക്ക് തുടക്കമിട്ടു. ജർമ്മനിയിലെ വലിയ നഗരങ്ങളിലും ചെറു കമ്മ്യൂണിറ്റികളിലുമായി 30,000 പോസ്റ്ററുകൾ പ്രദർശിപ്പിച്ചുകൊണ്ടാണ് ഈ കാമ്പെയ്ൻ പൗരന്മാരിലേക്ക് എത്തുക.

ആരോ ഒരാൾ നിങ്ങളെക്കുറിച്ച് ആവേശത്തിലാണ്, നിങ്ങൾക്ക് എങ്ങനെ സ്നേഹം കണ്ടെത്താൻ കഴിയും, ഞാൻ ആരാണോ ആ നിലയിൽ എന്നെ ഇഷ്ടപ്പെടുന്ന ആരെങ്കിലും അവിടെയുണ്ടോ തുടങ്ങിയ ചിന്തോദ്ദീപകമായ ചോദ്യങ്ങളാണ് പോസ്റ്ററുകളിലെ പ്രധാന ആകർഷണം. ഈ ചോദ്യങ്ങൾക്കൊടുവിൽ കൂടുതൽ വിവരങ്ങൾക്ക് നിങ്ങളുടെ പള്ളിയിലും ബൈബിൾ ടിവിയിലും എന്ന സന്ദേശവും നൽകുന്നുണ്ട്. കൈ-മാർക്കസ് താസ്ലർ (ഔട്ട്‌ഡോർ അഡ്വർടൈസിംഗ് അസോസിയേഷൻ മാനേജിംഗ് ഡയറക്ടർ) പറയുന്നതനുസരിച്ച് വിപുലമായ ഈ പ്രചാരണം മിക്കവാറും എല്ലാ പൗരന്മാരിലേക്കും എത്തിച്ചേരും. പോസ്റ്ററുകൾക്ക് പുറമെ സോഷ്യൽ മീഡിയ, ഫ്ലൈയറുകൾ, പോസ്റ്റ് കാർഡുകൾ എന്നിവ വഴിയും കാമ്പെയ്ൻ സജീവമാകും.