ക്രിസ്ത്യൻ സ്വത്തുക്കൾ കൈകാര്യം ചെയ്യാൻ ബോർഡ് രൂപീകരിക്കണമെന്ന് ഹൈക്കോടതി
മധുര: ഹിന്ദു, മുസ്ലീം സ്വത്തുക്കൾ കൈകാര്യം ചെയ്യാൻ പ്രത്യേക സ്ഥാപനങ്ങൾ ഉള്ളതുപോലെ, ക്രിസ്ത്യൻ സ്വത്തുക്കൾ കൈകാര്യം ചെയ്യുന്നതിനും നിയമപരമായി പ്രത്യേക ബോർഡ് രൂപീകരിക്കണമെന്നു മദ്രാസ് ഹൈക്കോടതി. ഇക്കാര്യത്തിൽ കേന്ദ്ര-സംസ്ഥാന സർക്കാരുകൾ മറുപടി നൽകണമെന്ന് മദ്രാസ് ഹൈക്കോടതിയുടെ മധുര ബെഞ്ച് ഉത്തരവിട്ടു. കന്യാകുമാരി ജില്ലയിലെ നാഗർകോവിൽ സ്കോട്ട് ക്രിസ്ത്യൻ കോളേജിലെ ചാൻസലർ നിയമനവുമായി ബന്ധപ്പെട്ട കേസിൽ വാദം കേൾക്കുകയായിരുന്നു കോടതി.
“സഭാ സ്വത്തുക്കളുടെ ദുർവിനിയോഗവും ഫണ്ട് ദുർവിനിയോഗവും പല കേസുകളിൽ നിന്നും വ്യക്തമാണ്. ഈ പ്രശ്നം പരിഹരിക്കാൻ, ഇടയ്ക്കിടെ ഇടക്കാല നടപടിയായി അഡ്മിനിസ്ട്രേറ്റർമാരെ നിയമിക്കുന്നത് സാധാരണമാണ്. ഈ പ്രശ്നത്തിന് ശാശ്വത പരിഹാരത്തിനുള്ള സമയം അതിക്രമിച്ചിരിക്കുന്നുവെന്ന് കോടതി കരുതുന്നു. ക്രിസ്ത്യൻ സ്ഥാപനങ്ങൾ വിദ്യാഭ്യാസം, വൈദ്യശാസ്ത്രം തുടങ്ങി വിവിധ പൊതുപ്രവർത്തനങ്ങൾ ചെയ്യുന്നുണ്ട് എന്നത് നിഷേധിക്കാനാവില്ല. ഈ സ്ഥാപനങ്ങളുടെ ആസ്തികളും ഫണ്ടുകളും സംരക്ഷിക്കപ്പെടണം. ഹിന്ദു, ഇസ്ലാമിക ട്രസ്റ്റുകൾ നിയമപരമായ വ്യവസ്ഥകളാൽ നിയന്ത്രിക്കപ്പെടുന്നു. ഇവരെ സംരക്ഷിക്കാൻ എൻഡോവ്മെൻ്റ് വകുപ്പും വഖഫ് ബോർഡുമുണ്ട്. എന്നാൽ ക്രിസ്ത്യൻ സംഘടനകൾക്ക് അത്തരമൊരു സമഗ്രമായ നിയന്ത്രണമില്ല.” കോടതി പറഞ്ഞു.
ക്രിസ്ത്യൻ പള്ളികളുടെ സംവിധാനങ്ങളെ കൂടുതൽ ഉത്തരവാദിത്തമുള്ളതാക്കുന്നതിനും ഭരണപരമായ കാര്യങ്ങൾ സംഘടിപ്പിക്കുന്നതിനുമായി ഒരു നിയമപരമായ ബോർഡ് ഉണ്ടായിരിക്കണം. അതിനാൽ കേന്ദ്ര ആഭ്യന്തരമന്ത്രാലയം ജോയിൻ്റ് സെക്രട്ടറിയെയും തമിഴ് നാട് സർക്കാർ പ്രിൻസിപ്പൽ സെക്രട്ടറിയെയും ഈ കേസിൽ പ്രതിചേർത്തു. ക്രിസ്ത്യൻ സ്വത്തുക്കൾ ക്രമപ്പെടുത്തുന്നതിന് നിയമപരമായ ബോർഡ് സ്ഥാപിക്കുന്നത് സംബന്ധിച്ച് ഇരുവരും വിശദമായ റിപ്പോർട്ട് സമർപ്പിക്കണം എന്ന് ജസ്റ്റിസ് സതീഷ് കുമാറിന്റെ ഉത്തരവിൽ പറയുന്നു
