*എഫ്.സി.ആർ.എ നിയമങ്ങളിൽ ആശങ്കയുമായി ശശി തരൂർ എം പി*

തിരുവനന്തപുരം : വിദേശ സംഭാവന നിയന്ത്രണ നിയമത്തിലെ പുതിയ ഭേദഗതികൾ ജനാധിപത്യ മൂല്യങ്ങൾക്കും ഭരണഘടനാ അവകാശങ്ങൾക്കും വിരുദ്ധമാണെന്ന് ശശി തരൂർ എം.പി അഭിപ്രായപ്പെട്ടു. സന്നദ്ധസംഘടനകളെയും ക്രൈസ്തവ സ്ഥാപനങ്ങളെയും പ്രതികൂലമായി ബാധിക്കുന്ന ഈ വ്യവസ്ഥകൾക്കെതിരെ അദ്ദേഹം ഗൗരവമായ ആശങ്ക പ്രകടിപ്പിച്ചു. ഒരു സ്ഥാപനത്തിന്റെ എഫ്.സി.ആർ.എ ലൈസൻസ് റദ്ദാക്കിയാൽ നിയമപരമായ പരിഹാര മാർഗ്ഗങ്ങൾ പരിമിതമാണെന്നും, സ്വതന്ത്രമായ അപ്പീൽ സംവിധാനങ്ങളുടെ അഭാവം നീതി തേടുന്നതിനെ സങ്കീർണ്ണമാക്കുന്നുവെന്നും അദ്ദേഹം ചൂണ്ടിക്കാട്ടി.

ഭരണഘടനയുടെ ആർട്ടിക്കിൾ 300A പ്രകാരമുള്ള സ്വത്തവകാശ ലംഘന സാധ്യതയെക്കുറിച്ചും ആർട്ടിക്കിൾ 14 ഉറപ്പുനൽകുന്ന നിയമത്തിന് മുന്നിലെ സമത്വത്തെക്കുറിച്ചും അദ്ദേഹം മുന്നറിയിപ്പ് നൽകി. ലൈസൻസ് സസ്പെൻഡ് ചെയ്യപ്പെടുന്ന സാഹചര്യത്തിൽ സ്ഥാപനങ്ങളുടെ സ്വത്തുക്കൾ സർക്കാർ അതോറിറ്റിയുടെ കീഴിലാകുന്നത് ആശുപത്രികളുടെയും സ്കൂളുകളുടെയും പ്രവർത്തനങ്ങളെ ബാധിക്കാനിടയുണ്ട്. ഇത് ഭരണഘടനാപരമായ വെല്ലുവിളിയാണെന്നും സെക്ഷൻ 32 പ്രകാരമുള്ള പുനഃപരിശോധനാ അപേക്ഷകൾ ഫലപ്രദമാകാൻ സാധ്യത കുറവാണെന്നും അദ്ദേഹം കൂട്ടിച്ചേർത്തു.