ഫിലഡൽഫിയയിൽ സ്‌കൂബാ വിബിഎസ് നടന്നു

ഫിലഡൽഫിയ : സെൻ്റ് തോമസ് സീറോമലബാർ ഫൊറോന ദേവാലയത്തിലെ മതബോധനസ്‌കൂളിന്റെ ആഭിമുഖ്യത്തിൽ ഓഗസ്‌റ്റ് 5 മുതൽ 8 വരെ സ്‌കൂബാ വിബിഎസ് നടന്നു. അഞ്ചാം ക്ലാസ് വരെയുള്ള കുട്ടികൾക്കുവേണ്ടിയായിരുന്നു വിബിഎസ്.

മതബോധനസ്‌കൂൾ കുട്ടികൾ സാധാരണ ഞായറാഴ്ച്ചകളിൽ വിശ്വാസപരിശീലനം നടത്തിയിരുന്ന ക്ലാസ് മുറികളും സോഷ്യൽ ഹാളും, ലോബിയുമെല്ലാം ബൈബിൾ പഴയനിയമത്തിലെ മനുഷ്യ-മൃഗ കഥാപാത്രങ്ങളെക്കൊണ്ട് തികച്ചും നാടകീയമായ രീതിയിൽ സജ്ജമാക്കിയിരുന്നു. റവ. ജോർജ് ദാനവേലിൽ ഉദ്ഘാടനം നിർവഹിച്ചു. ബൈബിളിനെക്കുറിച്ചുള്ള സമഗ്രപഠനമാണ് ഒരാഴ്ചത്തെ പരിശീലന പദ്ധതികൊണ്ട് ഉദ്ദേശിച്ചത്. ‘ഗോഡ് ഈസ് എ ഫ്രണ്ട് ഹൂ ഈസ് റിയൽ, ഹൂ ലവ് അസ്, ഹൂ വി ക്യാൻ ട്രസ്റ്റ്, ഫ്രണ്ട് ഫോർ എവരിവൺ’ എന്ന ആശയങ്ങളിലാണ് ക്ലാസ്സുകൾ നയിച്ചത്. ക്രിസ്‌റ്റോ തങ്കച്ചൻ, ജയ്ക്ക് ബെന്നി, ജോനാഥൻ ലൂയിസ്, ജെന്നാ നിഖിൽ എന്നിവർ വിബിഎസ് കോർഡിനേറ്റർമാരായി പ്രവർത്തിച്ചു.