*കന്റർബറിയിലെ ആദ്യ വനിതാ ആർച്ച് ബിഷപ്പായി സാറാ മുളള്ളി സ്ഥാനാരോഹണം ചെയ്തു*

യുകെ : ലോകമെമ്പാടുമുള്ള 8.5 കോടി ആംഗ്ലിക്കൻ വിശ്വാസികളുടെ ആത്മീയ തലപ്പത്തേക്ക് ആദ്യമായി ഒരു വനിത കടന്നുവന്നു. മുൻ നേഴ്സ് കൂടിയായ 63-കാരി സാറാ മുളള്ളി ബുധനാഴ്ച കന്റർബറി കത്തീഡ്രലിൽ നടന്ന പ്രൗഢഗംഭീരമായ ചടങ്ങിൽ കന്റർബറി ആർച്ച് ബിഷപ്പായി ഔദ്യോഗികമായി ചുമതലയേറ്റു. വില്യം രാജകുമാരൻ, കെയ്റ്റ് മിഡിൽട്ടൺ, ബ്രിട്ടീഷ് പ്രധാനമന്ത്രി കീർ സ്റ്റാർമർ തുടങ്ങി രണ്ടായിരത്തോളം വിശിഷ്ട അതിഥികളുടെ സാന്നിധ്യത്തിൽ 13-ാം നൂറ്റാണ്ടിലെ ‘ചെയർ ഓഫ് സെന്റ് അഗസ്റ്റിനിൽ’ ഇരുന്നായിരുന്നു ഈ ചരിത്ര നിമിഷം.

ആഫ്രിക്കൻ ഗായകസംഘത്തിന്റെ അകമ്പടിയോടെ നടന്ന ചടങ്ങിൽ, സ്വർണ്ണ ലിപിയിലുള്ള കിരീടമണിഞ്ഞാണ് സാറാ തന്റെ ആദ്യ പ്രസംഗം നടത്തിയത്. മധ്യേഷ്യ, ഉക്രെയ്ൻ, സുഡാൻ, മ്യാൻമർ തുടങ്ങി യുദ്ധം തകർത്ത ലോകത്തിന്റെ വിവിധ ഭാഗങ്ങളിൽ സമാധാനം പുലരാൻ അവർ പ്രാർത്ഥിച്ചു. “കന്റർബറി ആർച്ച് ബിഷപ്പായുള്ള എന്റെ ശുശ്രൂഷ ഇന്ന് ആരംഭിക്കുമ്പോൾ, ഞാൻ ദൈവത്തോട് വീണ്ടും പറയുന്നു: ഇതാ ഞാൻ,” എന്ന വചനത്തോടെയാണ് അവർ തന്റെ ദൗത്യത്തിന് തുടക്കം കുറിച്ചത്.

സഭയ്ക്കുള്ളിൽ മുൻപ് നടന്ന സുരക്ഷാ വീഴ്ചകളെയും പീഡന സംഭവങ്ങളെയും സാറാ മുളള്ളി പ്രസംഗത്തിൽ പശ്ചാത്താപത്തോടെ അനുസ്മരിച്ചു. ഇത്തരം വീഴ്ചകളെത്തുടർന്ന് മുൻഗാമി ജസ്റ്റിൻ വെൽബിക്ക് രാജിവെക്കേണ്ടി വന്ന സാഹചര്യം കണക്കിലെടുത്ത്, സത്യം, അനുകമ്പ, നീതി എന്നിവയിൽ അധിഷ്ഠിതമായ പ്രവർത്തനങ്ങൾ കാഴ്ചവെക്കുമെന്ന് അവർ പ്രതിജ്ഞയെടുത്തു. പാരമ്പര്യവും ആഗോള പ്രതീകാത്മകതയും ഒത്തുചേർന്ന ഈ സ്ഥാനാരോഹണം ആംഗ്ലിക്കൻ സഭയുടെ ചരിത്രത്തിലെ ഏറ്റവും വലിയ പരിഷ്കരണമായാണ് വിലയിരുത്തപ്പെടുന്നത്.