നാട്ടകം പ്രത്യാശാനഗറിൽ ചർച്ച് ഓഫ് ഗോഡ് കേരള റീജിയൻ ജനറൽ കൺവൻഷൻ
തിരുവല്ല: ചർച്ച് ഓഫ് ഗോഡ് ഇൻ ഇന്ത്യ കേരള റീജിയൻ നൂറ്റിരണ്ടാമത് ജനറൽ കൺവൻഷൻ ജനുവരി 20 തിങ്കൾ മുതൽ 26 ഞായർ വരെ കോട്ടയം നാട്ടകം പ്രത്യാശ നഗറിൽ (ദൈവസഭ ഗ്രൗണ്ടിൽ) നടക്കും. ദൈവസഭ അഡ്‌മിനിസ്ട്രേറ്റീവ് ബിഷപ്പ് റവ. ജോമോൻ ജോസഫ് തിങ്കളാഴ്ച വൈകിട്ട് 6.30 ന് കൺവൻഷൻ ഉദ്ഘാടനം ചെയ്യും. എജ്യൂക്കേഷൻ ഡയറക്‌ടർ റവ.ജോസഫ് റ്റി.സാം അദ്ധ്യക്ഷത വഹിക്കും.വേൾഡ് മിഷൻ സൗത്ത് ഏഷ്യൻ സൂപ്രണ്ട് റവ. സി.സി. തോമസ് മുഖ്യ അതിഥി ആയിരിക്കും.
പാസ്റ്റർമാരായ ബെൻസൺ മത്തായി, ഷാജി കെ. ഡാനിയേൽ, ഷിബു തോമസ്, എബ്രഹാം ടൈറ്റസ്, ടോമി ജോസഫ്, സണ്ണി താഴംപള്ളം, ഏബ്രഹാം തോമസ്, രാജൻ ഏബ്രഹാം, എബി ഏബ്രഹാം, ജെയ്സ് പാണ്ടനാട്, അനീഷ് കാവാലം, കെ. ജെ തോമസ്, വർഗീസ് ഏബ്രഹാം എന്നിവരും ദൈവസഭയിൽ നിന്നുള്ള അനുഗ്രഹീതരായ ദൈവദാസന്മാരും വിവിധ യോഗങ്ങളിൽ പ്രസംഗിക്കും.
യേശുവിനെ ശ്രദ്ധിച്ചു നോക്കുവിൻ.” (എബ്രാ.2:1) എന്നതാണ് കൺവൻഷൻ തീം. കൺവൻഷനിൽ വിവിധ ക്ഷേമ പദ്ധതികളുടെ പ്രഖ്യാപനങ്ങൾ നടത്തും. അത്യാധുനിക നിലവാരത്തിലുള്ള ഓഫീസ് സമുച്ചയ നിർമ്മാണ പദ്ധതിയ്ക്ക് തുടക്കം കുറിയ്ക്കും. ദൈവദാസന്മാരുടെ ക്ഷേമത്തെ മുൻനിർത്തി റിട്ടയേഡ് ആയ ദൈവദാസന്മാർക്ക് മാസംതോറും ക്ഷേമപെൻഷൻ പദ്ധതി ഉദ്ഘാടനം ചെയ്യും. കർത്താവിൽ നിദ്ര പ്രാപിച്ച ദൈവദാസന്മാരുടെ സഹധർമ്മിണികൾക്കു ക്ഷേമപെൻഷനും, അർഹരായ ദൈവദാസൻമാർക്കുള്ള ചികിത്സ സഹായവും നൽകും. സെമിത്തേരിയും സഭാ ഹാളും ഇല്ലാത്ത സഭകൾക്ക് നിർമ്മാണ പ്രവർത്തനങ്ങൾക്ക് ആവശ്യമായ സാമ്പത്തികം ഉറപ്പു വരുത്തും. വാടക കെട്ടിടത്തിൽ പ്രവർത്തിക്കുന്ന സഭയ്ക്ക് വാടക മുടക്കം കൂടാതെ നല്‌കും.
കൺവൻഷനോട് അനുബന്ധിച്ച് വിശുദ്ധആരാധന, സംഗീത ശുശ്രൂഷ, പൊതുയോഗം, ദൈവവചന പ്രഭാഷണങ്ങൾ, ബൈബിൾ കോളേജ് ഗ്രാജുവേഷൻ, യൂത്ത് ആൻഡ് സൺഡേസ്‌കൂൾ പ്രോഗ്രാം. വനിതാ സമ്മേളനം, സ്നാനശുശ്രൂഷ, സാംസ്കാരിക സമ്മേളനം, മിഷനറി കോൺഫറൻസ് എന്നിവ നടക്കും. ചർച്ച് ഓഫ് ഗോഡ് ക്വയർ ഗാന ശുശ്രൂഷയ്ക്ക് നേതൃത്വം നൽകും. 26-ാം തീയതി ഞായറാഴ്ച്ച നടക്കുന്ന വിശുദ്ധ സഭായോഗത്തിൽ ജനസാഗരങ്ങൾ പങ്കെടുക്കുന്ന തിരുവത്താഴ ശുശ്രൂഷയോടെ കൺവൻഷൻ സമാപിക്കും.
തിരുവല്ലയിൽ നടന്ന മീഡിയ സമ്മേളനത്തിൽ ദൈവസഭ ഓവർസിയർ റവ. ജോമോൻ ജോസഫ് കാര്യപരിപാടികൾ വിശദീകരിച്ചു. പാസ്റ്റർമാരായ വി പി ഫിലിപ്പ്, ജെ ബു ജോൺസൺ, ജോമോൻ മാത്യു, ബ്രദർ പി ജി പ്രസാദ്, ബ്രദർ ജീൻസൺ ടി ജോസ് എന്നിവർ പങ്കെടുത്തു
