കൊടഗിൽ ക്രൈസ്തവർക്കെതിരായ ആക്രമണം; ന്യൂനപക്ഷ കമ്മീഷനും ഡി.ജി.പി.ക്കും നിവേദനം

കൊടഗു : കഴിഞ്ഞ രണ്ട് മാസമായി കൊടഗു ജില്ലയിൽ ക്രൈസ്തവ പ്രാർത്ഥനാലയങ്ങൾക്കും വീടുകളിൽ നടക്കുന്ന പ്രാർത്ഥനാ യോഗങ്ങൾക്കും നേരെ തുടർച്ചയായി ആക്രമണങ്ങളും ഭീഷണികളും തടസ്സങ്ങളും ഉണ്ടായി വരുന്നതായി ആരോപിച്ച്, ക്രൈസ്തവ സംഘടനകൾ കർണാടക സംസ്ഥാന ന്യൂനപക്ഷ കമ്മീഷനും സംസ്ഥാന പോലീസ് മഹാനിർദേശകൻ (ഡി.ജി.പി.)ക്കും നിവേദനം സമർപ്പിച്ചു.

ഭരണഘടന ഉറപ്പുനൽകുന്ന മതസ്വാതന്ത്ര്യവും സമാധാനപരമായി പ്രാർത്ഥന നടത്താനുള്ള അവകാശവും സംരക്ഷിക്കണമെന്ന് നിവേദനത്തിൽ ആവശ്യപ്പെട്ടു. പ്രാർത്ഥനാലയങ്ങൾക്കും വിശ്വാസികൾക്കും നേരെയുള്ള ആക്രമണങ്ങൾ തടയാൻ അടിയന്തര നടപടികൾ സ്വീകരിക്കണമെന്നും, കുറ്റക്കാർക്കെതിരെ കർശന നിയമനടപടി സ്വീകരിക്കണമെന്നും, ജില്ലയിലെ ക്രൈസ്തവ സമൂഹത്തിന് ആവശ്യമായ പോലീസ് സംരക്ഷണം ഉറപ്പാക്കണമെന്നും സംഘടനകൾ ആവശ്യപ്പെട്ടു.

നിവേദനം സമർപ്പിച്ച സംഘത്തിൽ കർണാടക ക്രിസ്ത്യൻ വികസന കോർപ്പറേഷൻ ഡയറക്ടർ പ്രശാന്ത് ജട്ടണ്ണ, ക്രൈസ്തവ സംഘടനാ നേതാക്കളായ പാസ്റ്റർ അബ്രഹാം കോശി, പാസ്റ്റർ ഫ്രെഡി കൂർഗ്, മഹാദേവ്, പാസ്റ്റർ സ്റ്റൻസൺ, മഞ്ജുനാഥ്, സിദ്ധു എന്നിവരും മറ്റ് ശുശ്രൂഷകരും പങ്കെടുത്തു.

വാർത്ത: പാ. ഫ്രെഡി കൂർഗ്