ഛത്തീസ്ഗഡിൽ ക്രൈസ്തവർക്ക് നേരെ ആക്രമണം ; അക്രമികളെ അറസ്റ്റ് ചെയ്യണമെന്ന് സർക്കാരിനോട് സി.എസ്.ഡബ്ല്യു

റായ്പൂർ  ഗ്രാമത്തിൽ ഞായറാഴ്ചത്തെ പ്രാർത്ഥനായോഗത്തിൽ പങ്കെടുത്ത അറുപതിലധികം ക്രൈസ്തവർക്ക് നേരെ ഉണ്ടായ അക്രമത്തിൽ നീതി ഉറപ്പാക്കണമെന്ന ആവശ്യവുമായി പ്രമുഖ മനുഷ്യാവകാശ സംഘടന രംഗത്തെത്തി. ക്രൈസ്തവ സമൂഹത്തിന് നേരെയുള്ള ഇത്തരം അതിക്രമങ്ങൾ ആഗോളതലത്തിൽ വലിയ ചർച്ചയാവുകയാണ്.

അക്രമവുമായി ബന്ധപ്പെട്ടവരെ എത്രയും വേഗം അറസ്റ്റ് ചെയ്ത് നിയമനടപടികൾ സ്വീകരിക്കണമെന്ന് പീഡിപ്പിക്കപ്പെടുന്ന ക്രൈസ്തവർക്കായി പ്രവർത്തിക്കുന്ന ‘ക്രിസ്ത്യൻ സോളിഡാരിറ്റി വേൾഡ് വൈഡ്’ (CSW) എന്ന സംഘടന ഛത്തീസ്ഗഡ് സർക്കാരിനോട് ഔദ്യോഗികമായി ആവശ്യപ്പെട്ടു. പ്രദേശത്ത് സമാധാനം പുനഃസ്ഥാപിക്കണമെന്നും അവർ കൂട്ടിച്ചേർത്തു.

കഴിഞ്ഞ മെയ് 31-ന് ഛത്തീസ്ഗഡിലെ സുക്മ ജില്ലയിലുള്ള സദ്രപാൽ ഗ്രാമത്തിലാണ് ക്രൂരമായ ഈ ആക്രമണം അരങ്ങേറിയത്. പ്രാർത്ഥനയിൽ ഏർപ്പെട്ടിരുന്ന വിശ്വാസികളെ ഒരു സംഘം ആളുകൾ അകാരണമായി മർദ്ദിക്കുകയായിരുന്നുവെന്നാണ് റിപ്പോർട്ടുകൾ വ്യക്തമാക്കുന്നത്.