*പുതിയൊരു മാർപ്പാപ്പയ്ക്ക് കീഴിൽ തങ്ങൾ സഭയിലേക്ക് മടങ്ങിവരുമെന്ന് വിമത കത്തോലിക്കാ വൈദികൻ*

വത്തിക്കാൻ : കത്തോലിക്കാ സഭയിൽ നിന്ന് പുറത്താക്കപ്പെട്ട ഒരു വിഭാഗത്തിലെ വൈദികൻ, ഭാവിയിൽ മറ്റൊരു മാർപ്പാപ്പയ്ക്ക് കീഴിൽ തങ്ങളുടെ കൂട്ടായ്മ സഭയിലേക്ക് തിരികെ സ്വാഗതം ചെയ്യപ്പെടുമെന്ന് ഞായറാഴ്ച വിശ്വാസികളോട് പറഞ്ഞു. തീവ്ര യാഥാസ്ഥിതിക കത്തോലിക്കാ വിഭാഗമായ ‘സൊസൈറ്റി ഓഫ് സെന്റ് പയസ് X’ ആണ് കഴിഞ്ഞ ദിവസം പുറത്താക്കപ്പെട്ടത്.

ലിയോ മാർപ്പാപ്പയുടെ അനുമതിയില്ലാതെ ബുധനാഴ്ച നാല് ബിഷപ്പുമാരെ വാഴിച്ചതിനെത്തുടർന്നാണ് ഈ വിമത വിഭാഗത്തിന് സഭ ഭ്രഷ്ട് കൽപ്പിച്ചത്. റോമുമായുള്ള ഈ ഭിന്നതയിൽ തങ്ങൾക്ക് ഖേദമില്ലെന്ന് വ്യക്തമാക്കിയ സംഘം, തങ്ങളുടെ ആശങ്കകൾ കേൾക്കാൻ ലിയോ മാർപ്പാപ്പ തയ്യാറായില്ലെന്നും കുറ്റപ്പെടുത്തി.

“ബെനഡിക്ട് മാർപ്പാപ്പയെപ്പോലെ, ഭാവിയിൽ നമുക്കായി വാതിൽ തുറന്ന് നമ്മെ തിരികെ സ്വാഗതം ചെയ്യുന്ന മറ്റൊരു മാർപ്പാപ്പ ഉണ്ടാകും,” വടക്കുകിഴക്കൻ സ്വിസ് നഗരമായ വിലിൽ നടന്ന കുർബാന മധ്യേ വൈദികനായ ജോർജ്ജ് കോപ് പറഞ്ഞു. സഭയുമായുള്ള ഭിന്നതകൾ താല്ക്കാലികം മാത്രമാണെന്നാണ് ഇദ്ദേഹം അവകാശപ്പെടുന്നത്.