*ജെറൂസലേമിൽ ചരിത്രം കുറിച്ച് അപൂർവ്വ കണ്ടെത്തൽ; 1300 വർഷം പഴക്കമുള്ള പെൻഡന്റ് കണ്ടെത്തി*

ജെറൂസലേം: ഇസ്രായേലിലെ പുരാതനമായ ടെമ്പിൾ മൗണ്ടിന്റെ തെക്കുപടിഞ്ഞാറേ കോണിന് താഴെ നടത്തിയ ഖനനത്തിൽ 1300 വർഷം പഴക്കമുള്ള അപൂർവ്വമായ ഒരു ലോക്കറ്റ് (പെൻഡന്റ്) കണ്ടെത്തി. പൂർണ്ണമായും ഈയത്തിൽ (lead) നിർമ്മിച്ച ഈ ചെറിയ പുരാവസ്തു ചരിത്രപരമായ ഒരു വലിയ വഴിത്തിരിവിലേക്കാണ് വെളിച്ചം വീശുന്നത്.

ആർക്കിയോളജി ചരിത്രത്തിൽ ഇതുവരെ കണ്ടെത്താത്ത സവിശേഷതകളുള്ള ഒന്നാണ് ഇതെന്നും ഇതൊരു അവിശ്വസനീയമായ നേട്ടമാണെന്നും ഇസ്രായേൽ ആന്റിക്വിറ്റീസ് അതോറിറ്റിയിലെ (IAA) ഫിലിപ്പ് വുകോസാവോവിക് വ്യക്തമാക്കി. മുൻകാല ചരിത്രത്തെയും ജനങ്ങളുടെ അടിയുറച്ച വിശ്വാസത്തെയും കുറിച്ചുള്ള നമ്മുടെ ധാരണകളെ മാറ്റിമറിക്കാൻ പോന്നതാണ് ഈ ചെറിയ ആഭരണമെന്ന് അദ്ദേഹം കൂട്ടിച്ചേർത്തു.

ഒരു ചെറിയ പെൻഡന്റാണെങ്കിൽ പോലും, ഇതിന്റെ ഇരുവശങ്ങളിലും യഹൂദ വിശ്വാസത്തിന്റെ പ്രതീകമായ ടെമ്പിൾ മെനോരയുടെ (ഏഴു ശാഖകളുള്ള വിളക്ക്) രൂപം കൃത്യമായി കൊത്തിവെച്ചിട്ടുണ്ട്. ഇസ്രായേലിന്റെ പുരാതന സംസ്കാരത്തിലേക്ക് വിരൽ ചൂണ്ടുന്ന ഈ കണ്ടെത്തൽ പുരാവസ്തു ഗവേഷകർക്കിടയിൽ വലിയ ആവേശമാണ് ഉണ്ടാക്കിയിരിക്കുന്നത്.