*ആദ്യകാല ക്രൈസ്തവ ചരിത്രത്തിലേക്ക് വെളിച്ചം വീശി തുർക്കിയിലെ പുരാവസ്തു കണ്ടെത്തലുകൾ*

ഇസ്താംബുൾ: റോമൻ ഭരണകൂടത്തിന്റെ ക്രൂരമായ പീഡനങ്ങൾ ഏറ്റുവാങ്ങിയിരുന്ന ഒരു ചെറിയ കൂട്ടായ്മയിൽ നിന്നും, ക്രിസ്തുമതം എങ്ങനെയാണ് ലോകത്തിലെ ഏറ്റവും സ്വാധീനമുള്ള മതമായി വളർന്നത് എന്നതിലേക്ക് വെളിച്ചം വീശുന്ന സുപ്രധാന പുരാവസ്തു കണ്ടെത്തലുകൾ തുർക്കിയിൽ പുറത്തുവന്നു. യേശുക്രിസ്തുവിന്റെ ഏറ്റവും പഴക്കമേറിയതും സുരക്ഷിതമായി സൂക്ഷിക്കപ്പെട്ടതുമായ ചിത്രങ്ങൾ, പുരാതന ദേവാലയങ്ങൾ, രഹസ്യ ക്രൈസ്തവ സന്ദേശങ്ങൾ എന്നിവയാണ് ഗവേഷകർ കണ്ടെത്തിയത്.

വിശുദ്ധ നാട്ടിനു പുറത്ത് ക്രിസ്തുമതം ആദ്യമായി വേരൂന്നിയ അനറ്റോളിയ (ഇന്നത്തെ തുർക്കി) ആദ്യകാല ക്രൈസ്തവ ചരിത്രത്തിന്റെ ഏറ്റവും പ്രധാനപ്പെട്ട കേന്ദ്രമായിരുന്നുവെന്ന് അടിവരയിടുന്നതാണ് ഈ കണ്ടെത്തലുകൾ. റോമൻ ചക്രവർത്തിമാരെ ദൈവമായി ആരാധിക്കുന്നതിനെതിരെ ആദ്യകാല ക്രിസ്ത്യാനികൾ നടത്തിയ ശക്തമായ പ്രതിരോധത്തിന്റെ തെളിവുകളും ഇതിലൂടെ പുറത്തുവന്നിട്ടുണ്ട്.

ഇവയിൽ ഏറ്റവും ശ്രദ്ധേയമായത് പുരാതന നൈസിയ (ഇന്നത്തെ ഇസ്നിക്) നഗരത്തിന് സമീപം കണ്ടെത്തിയ യേശുക്രിസ്തുവിന്റെ ഫ്രെസ്കോ (ചുവർച്ചിത്രം) ആണ്. മൂന്നാം നൂറ്റാണ്ടിന്റെ മധ്യത്തിൽ നിർമ്മിക്കപ്പെട്ട ഈ ചിത്രത്തിൽ യേശുവിനെ ഒരു ‘നല്ല ഇടയനായി’ (Good Shepherd) ആടുകളെ തോളിലേറ്റിയിരിക്കുന്ന രൂപത്തിലാണ് ചിത്രീകരിച്ചിരിക്കുന്നത്.