പഴക്കമേറിയ ഇമ്മാനുവൽ ചർച്ച് നവീകരിക്കുന്നു;

ലണ്ടൻ: ലങ്കാഷെയറിലെ ഓസ്വാൾഡ്‌ട്വിസ്റ്റിലുള്ള ചരിത്രപ്രസിദ്ധമായ ഇമ്മാനുവൽ ചർച്ചിന്റെ അടിയന്തര അറ്റകുറ്റപ്പണികൾക്കായി നാഷണൽ ലോട്ടറി ഹെറിറ്റേജ് ഫണ്ടിൽ നിന്ന് 2,50,000 പൗണ്ട് ധനസഹായം അനുവദിച്ചു. 1836-37 കാലഘട്ടത്തിൽ നിർമ്മിച്ച ഈ ഗ്രേഡ് II ലിസ്റ്റഡ് കെട്ടിടത്തിന്റെ മേൽക്കൂര പുനരുദ്ധരിക്കാനാണ് തുക വിനിയോഗിക്കുക.

പട്ടണത്തിലെ ഏറ്റവും പഴക്കമേറിയ ഈ കെട്ടിടം ആരാധനയ്ക്കും വിവിധ സാമൂഹിക പ്രവർത്തനങ്ങൾക്കുമായി വരുംതലമുറകൾക്കും നിലനിർത്താൻ ഈ ഫണ്ട് സഹായിക്കുമെന്ന് ചർച്ച് ഭാരവാഹികൾ പറഞ്ഞു. പ്രാദേശിക പൈതൃകം സംരക്ഷിക്കുന്നതിനൊപ്പം പ്രദേശവാസികൾക്കും സ്കൂളുകൾക്കും ഇതിന്റെ ഭാഗമാകാൻ പ്രത്യേക പരിശീലന പരിപാടികളും സംഘടിപ്പിക്കും
.

ഇംഗ്ലണ്ടിലെ ചരിത്രപ്രസിദ്ധമായ പള്ളികൾ കടുത്ത സാമ്പത്തിക പ്രതിസന്ധി നേരിടുന്ന സമയത്താണ് ഈ സഹായം ലഭിക്കുന്നത്. പള്ളികളുടെ അറ്റകുറ്റപ്പണികൾക്കുള്ള വാറ്റ് (VAT) റീഫണ്ട് പദ്ധതി സർക്കാർ നിർത്തലാക്കിയത് ഇത്തരം പൈതൃക സ്മാരകങ്ങളുടെ സംരക്ഷണത്തിന് വലിയ ഭാരമായി മാറിയിട്ടുണ്ടെന്ന് നാഷണൽ ചർച്ചസ് ട്രസ്റ്റ് അടുത്തിടെ വിമർശിച്ചിരുന്നു.