മണിപ്പൂരിൽ ക്രൈസ്തവ വിഭാഗങ്ങൾക്കിടയിൽ സംഘർഷം കനക്കുന്നു; വീടുകൾക്ക് തീവെച്ചു!

മണിപ്പൂർ : മണിപ്പൂരിലെ കാങ്‌പോക്പി ജില്ലയിലുള്ള ലോയ്ബോൾ ഖുള്ളൻ ഗ്രാമത്തിൽ ജൂൺ അഞ്ചിന് പുലർച്ചെയുണ്ടായ വെടിവയ്പ്പിൽ ഒരു സ്ത്രീ ഉൾപ്പെടെ മൂന്ന് കുക്കി വിഭാഗക്കാർ കൊല്ലപ്പെടുകയും ഏഴ് വീടുകൾ അഗ്നിക്കിരയാക്കപ്പെടുകയും ചെയ്തു. സംസ്ഥാനത്ത് നിലനിൽക്കുന്ന തടവിലാക്കൽ പ്രതിസന്ധിക്കിടയിലാണ് ഈ പുതിയ ആക്രമണം ഉണ്ടായിരിക്കുന്നത്.

കഴിഞ്ഞ രണ്ട് മാസമായി മണിപ്പൂരിലെ ക്രൈസ്തവ ഗോത്രവിഭാഗങ്ങളായ കുക്കി, നാഗാ സമൂഹങ്ങൾക്കിടയിൽ ബന്ധം വഷളായതിനെത്തുടർന്ന് ഇരുപക്ഷത്തുനിന്നുമായി നിരവധി ആളുകൾ കൊല്ലപ്പെട്ടിട്ടുണ്ട്. നിരായുധരായ സാധാരണക്കാർക്ക് നേരെ നടന്ന ഈ ക്രൂരമായ ആക്രമണത്തെ കുക്കി സംഘടനയായ ‘കുക്കി ഇൻപി മണിപ്പൂർ’ ശക്തമായി അപലപിക്കുകയും മനുഷ്യാവകാശ ലംഘനമായി വിശേഷിപ്പിക്കുകയും ചെയ്തു.

2023 മെയ് മൂന്നിന് കുക്കി-സോ, മേയ്തേയ് വിഭാഗങ്ങൾ തമ്മിൽ ആരംഭിച്ച വംശീയ കലാപത്തിൽ ഇതിനകം 260-ലധികം ജീവനുകൾ നഷ്ടപ്പെടുകയും മുന്നൂറ്റി അറുപതോളം ചർച്ചുകൾ തകർക്കപ്പെടുകയും ചെയ്തിട്ടുണ്ട്. എന്നാൽ, നിലവിൽ ക്രൈസ്തവ ഗോത്രവിഭാഗങ്ങൾ തമ്മിലുണ്ടായ ഈ പുതിയ ആഭ്യന്തര സംഘർഷത്തിൽ സഭാ നേതൃത്വവും വൈദികരും വലിയ ആശങ്ക പ്രകടിപ്പിച്ചു.