ഹത്രാസിൽ മതഭ്രാന്ത്; ക്രിസ്ത്യൻ കുടുംബത്തെ ചെരുപ്പുമാല അണിയിച്ച് നടത്തിച്ചു!

ലക്നൗ: ഉത്തർപ്രദേശിലെ ഹത്രാസിൽ കേട്ടാൽ അറയ്ക്കുന്ന ക്രൂരതയാണ് നടന്നത്. ക്രിസ്ത്യൻ വിശ്വാസം ഉപേക്ഷിക്കാത്തതിന് ബൽറാമിനെയും ഭാര്യയെയും മകനെയും ഗ്രാമത്തലവന്മാരുടെ മുന്നിലിട്ട് പരസ്യമായി ചെരുപ്പുമാല അണിയിച്ച് നടത്തിച്ചു. സ്വന്തം അച്ഛനും സഹോദരനും മുന്നിൽ നിന്ന് ഈ നാണംകെട്ട കളിക്ക് നേതൃത്വം കൊടുത്തു എന്നതാണ് ഏറ്റവും സങ്കടകരം.

​വിശ്വാസം മാറ്റിയില്ലെങ്കിൽ നാട്ടിൽ കാലുകുത്താൻ സമ്മതിക്കില്ലെന്നും ഒറ്റപ്പെടുത്തുമെന്നുമായിരുന്നു ഇവരുടെ ഭീഷണി. ഗ്രാമപഞ്ചായത്ത് വിളിച്ചുകൂട്ടിയാണ് ഈ ആസൂത്രിത ആക്രമണം നടത്തിയത്. സംഭവം വീഡിയോ എടുത്ത് സോഷ്യൽ മീഡിയയിൽ ഇട്ടതോടെയാണ് നാട്ടുകാർ വിവരമറിയുന്നത്.

​വീഡിയോ കണ്ട് മുർസാൻ പോലീസ് സ്ഥലത്തെത്തി കാര്യങ്ങൾ അരിച്ചുപെറുക്കി. ബൽറാമിന്റെ അച്ഛനെയും സഹോദരനെയും പോലീസ് പൊക്കി സ്റ്റേഷനിൽ കൊണ്ടുപോയിട്ടുണ്ട്. ഭരണഘടനയും നിയമവും കാറ്റിൽ പറത്തി ഗ്രാമത്തിൽ സ്വന്തം നിയമം നടപ്പിലാക്കാൻ നോക്കിയവർക്ക് പണി കിട്ടിയെന്ന് തന്നെയാണ് നാട്ടിലെ സംസാരം.