മോദി-നെതന്യാഹു കൂടിക്കാഴ്ച: ഇന്ത്യ-ഇസ്രായേൽ ബന്ധത്തിൽ പുതിയ അധ്യായം

ഇസ്രായേൽ : രണ്ട് ദിവസത്തെ സന്ദർശനത്തിനായി ഇസ്രായേലിലെത്തിയ പ്രധാനമന്ത്രി നരേന്ദ്ര മോദിക്ക് ടെൽ അവീവിലെ ബെൻ ഗുരിയൻ വിമാനത്താവളത്തിൽ ഊഷ്മളമായ സ്വീകരണം ലഭിച്ചു. ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവും ഭാര്യ സാറ നെതന്യാഹുവും നേരിട്ടെത്തിയാണ് അദ്ദേഹത്തെ സ്വീകരിച്ചത്. തുടർന്ന് ഇരു നേതാക്കളും വിമാനത്താവളത്തിൽ വെച്ച് തന്നെ സ്വകാര്യ കൂടിക്കാഴ്ച നടത്തി. ഇതിന് ശേഷം ജെറുസലേമിലേക്ക് പോകുന്ന പ്രധാനമന്ത്രി ഇസ്രായേൽ പാർലമെന്റായ നെസെറ്റിനെ അഭിസംബോധന ചെയ്യും. ഈ ബഹുമതി ലഭിക്കുന്ന ആദ്യ ഇന്ത്യൻ പ്രധാനമന്ത്രിയാണ് അദ്ദേഹം.

ബുധനാഴ്ച വൈകുന്നേരം വാൾഡോർഫ് അസ്റ്റോറിയ ഹോട്ടലിൽ നടക്കുന്ന നവീനാശയ പരിപാടിയിൽ ഇരു പ്രധാനമന്ത്രിമാരും പങ്കെടുക്കും. രാത്രിയിൽ നെതന്യാഹുവും ഭാര്യയും പ്രധാനമന്ത്രി മോദിക്ക് വിരുന്നൊരുക്കും. വ്യാഴാഴ്ച രാവിലെ ഹോളോകോസ്റ്റ് സ്മാരകമായ യാദ് വഷേം സന്ദർശിച്ച് ആദരവർപ്പിക്കുന്ന പ്രധാനമന്ത്രി, തുടർന്ന് കിംഗ് ഡേവിഡ് ഹോട്ടലിൽ വെച്ച് ഇസ്രായേൽ പ്രധാനമന്ത്രിയുമായി വിപുലമായ ഉഭയകക്ഷി ചർച്ചകൾ നടത്തും.

ഈ സന്ദർശന വേളയിൽ സാമ്പത്തിക, സുരക്ഷാ, നയതന്ത്ര മേഖലകളിൽ ഇരുരാജ്യങ്ങളും തമ്മിലുള്ള സഹകരണം വർദ്ധിപ്പിക്കുന്നതിനായി നിരവധി സുപ്രധാന കരാറുകളിൽ ഒപ്പിടും. പ്രതിരോധം, കൃഷി, സൈബർ സുരക്ഷ എന്നിവയ്ക്ക് പുറമെ ആർട്ടിഫിഷ്യൽ ഇന്റലിജൻസ്, ക്വാണ്ടം കമ്പ്യൂട്ടിംഗ് തുടങ്ങിയ നൂതന മേഖലകളിലെ സഹകരണവും ചർച്ചകളിൽ മുൻതൂക്കം നേടും. കരാറുകൾ ഒപ്പിട്ട ശേഷം ഇരു നേതാക്കളും സംയുക്ത പ്രസ്താവന നടത്തും