*സ്കൂൾ പാഠ്യപദ്ധതിയിൽ ബൈബിൾ ഉൾപ്പെടുത്താൻ ടെക്സസ് വിദ്യാഭ്യാസ ബോർഡ് അനുമതി നൽകി*

ടെക്സസ്: സ്കൂളുകളിലെ പ്രധാന പാഠ്യപദ്ധതിയിൽ ബൈബിൾ കഥകൾ ഉൾപ്പെടുത്താൻ ടെക്സസ് സ്കൂൾ ബോർഡ് വോട്ട് രേഖപ്പെടുത്തി. ഇതനുസരിച്ച് ആദാമിന്റെയും ഹവ്വയുടെയും സൃഷ്ടിപ്പിന്റെ ചരിത്രവും, ധൂർത്തനായ പുത്രന്റെ ഉപമയും ഉൾപ്പെടെയുള്ള പ്രശസ്തമായ ബൈബിൾ ഭാഗങ്ങൾ ഇനി മുതൽ ടെക്സസിലെ സ്കൂൾ വിദ്യാർത്ഥികളുടെ വായനാ പട്ടികയിൽ ഇടംപിടിക്കും.

സംസ്ഥാനത്തെ അമ്പത് ലക്ഷത്തോളം വരുന്ന വിദ്യാർത്ഥികൾക്കായുള്ള ഇംഗ്ലീഷ് സാഹിത്യ പാഠ്യപദ്ധതിയിലാണ് ബൈബിൾ ഭാഗങ്ങൾ ഉൾപ്പെടുത്താൻ അധ്യാപകർക്ക് നിർദ്ദേശം നൽകുക. വില്യം ഷേക്സ്പിയർ, ചാർലസ് ഡിക്കൻസ് എന്നിവരുടെ പ്രശസ്തമായ ക്ലാസിക് കൃതികൾക്കൊപ്പം തന്നെയാകും ഇനി മുതൽ ബൈബിളിലെ സാഹിത്യപരമായ ഉള്ളടക്കങ്ങളും കുട്ടികളെ പഠിപ്പിക്കുന്നത്.

വിദ്യാർത്ഥികളുടെ പ്രായത്തിനനുസരിച്ച് പഴയ നിയമത്തിലെയും പുതിയ നിയമത്തിലെയും വിവിധ ഭാഗങ്ങളാണ് ഇതിനായി തിരഞ്ഞെടുത്തിട്ടുള്ളത്. പ്രൈമറി ക്ലാസുകളിലെ കുട്ടികൾക്ക് ദാവീദിന്റെയും ഗോലിയാത്തിന്റെയും കഥ ചിത്രപുസ്തകങ്ങളിലൂടെ പഠിക്കാം, അതേസമയം മുതിർന്ന ക്ലാസുകളിലെ വിദ്യാർത്ഥികൾക്ക് ബൈബിളിലെ ‘ഇയ്യോബിന്റെ പുസ്തകം’ വിശദമായി പഠിക്കാനുള്ള അവസരമുണ്ടാകും.