സുവിശേഷ പ്രസംഗകർക്ക് നിയമ സഹായവുമായി സ്ട്രീറ്റ് പ്രീച്ചേഴ്‌സ് ചാർട്ടർ

ലണ്ടൻ: പൊതു ഇടങ്ങളിൽ സുവിശേഷം പ്രസംഗിക്കുന്നവരുടെ അവകാശങ്ങളും ഉത്തരവാദിത്തങ്ങളും വ്യക്തമാക്കുന്ന സ്ട്രീറ്റ് പ്രീച്ചേഴ്‌സ് ചാർട്ടർ ക്രിസ്ത്യൻ ഇൻസ്റ്റിറ്റ്യൂട്ട് പുറത്തിറക്കി. തെരുവ് പ്രസംഗകരും പോലീസ് ഉദ്യോഗസ്ഥരും തമ്മിൽ അടുത്തിടെയുണ്ടായ ഏറ്റുമുട്ടലുകളുടെ പശ്ചാത്തലത്തിലാണ് ഈ നിയമപരമായ മാർഗ്ഗരേഖ പുറത്തിറക്കിയത്.

തുറന്ന സ്ഥലങ്ങളിലെ സുവിശേഷ പ്രവർത്തനങ്ങളുടെ നിയമങ്ങൾ, ചെയ്യേണ്ടതും ചെയ്യരുതാത്തതുമായ കാര്യങ്ങൾ, സാമൂഹിക വിരുദ്ധ നിയമങ്ങൾ എന്നിവയെക്കുറിച്ച് ഈ ചാർട്ടർ വിശദീകരിക്കുന്നു. പോലീസ് ഉദ്യോഗസ്ഥരും സുവിശേഷകരും തമ്മിലുള്ള ബന്ധം മെച്ചപ്പെടുത്താനും പരസ്പരം ബഹുമാനം ഉറപ്പുവരുത്തുന്ന ഒരു ധാരണയിലെത്താനുമാണ് ചാർട്ടർ ലക്ഷ്യമിടുന്നതെന്ന് ക്രിസ്ത്യൻ ഇൻസ്റ്റിറ്റ്യൂട്ടിന്റെ നിയമ വിഭാഗം മേധാവി സാം വെബ്‌സ്റ്റർ പറഞ്ഞു. സുവിശേഷം പ്രസംഗിക്കപ്പെടേണ്ടത് അത്യാവശ്യമാണ്. അതിന് ഒരിടവും അതിരുകളായി മാറരുത്. എന്നാൽ അത് ഉത്തരവാദിത്തത്തോടെയും മാന്യമായ രീതിയിലും ചെയ്യണം എന്ന് വെബ്‌സ്റ്റർ പറഞ്ഞു.