ബാംഗ്ലൂരിൽ സ്പെഷ്യൽ ഡ്രൈവ്: 5 മണിക്കൂറിനുള്ളിൽ പോലീസ് പിഴ ഈടാക്കിയത് 88 ലക്ഷം രൂപ

ബാംഗ്ലൂർ : ഗതാഗത നിയമലംഘനം നടത്തിയതിന് അഞ്ച് മണിക്കൂറിനുള്ളിൽ ബെംഗളൂരു ട്രാഫിക് പോലീസ് പിഴ ഈടാക്കിയത് 88 ലക്ഷം രൂപ. ഗതാഗത നിയമലംഘനത്തിനെതിരെ നടന്ന സ്പെഷ്യൽ ഡ്രൈവിലാണിത്.

രാവിലെ 11 മുതൽ വൈകിട്ട് 4 വരെ നടത്തിയ ഡ്രൈവിൽ 1,757 കേസുകൾ രജിസ്റ്റർ ചെയ്യുകയും 88.6 ലക്ഷം രൂപ പിഴ ഈടാക്കുകയും ചെയ്തു. തെറ്റായ ദിശയിലോ നോ എൻട്രി സ്ട്രെച്ചുകളിലോ വാഹനമോടിച്ച കേസുകളാണ് കൂടുതൽ കേസുകൾ. ഹെൽമറ്റ് ധരിക്കാതെ വാഹനമോടിച്ചതിന് 718 കേസുകൾ റിപ്പോർട്ട് ചെയ്തു. ഈസ്റ്റ് ഡിവിഷൻ ട്രാഫിക് പോലീസ് നവംബർ 4 നും 7 നും ഇടയിൽ ഡെലിവറി ജീവനക്കാർ സാധാരണയായി ഉപയോഗിക്കുന്ന ഇ-ബൈക്കുകൾ കേന്ദ്രീകരിച്ച് പ്രത്യേക ഡ്രൈവ് നടത്തിയിരുന്നു. ഇതിൽ വൺവേ നിയന്ത്രണം ലംഘിച്ചതിന് 141 കേസുകളും ഫുട്പാത്തിൽ വാഹനം ഓടിച്ചതിന് 35 കേസുകളും രജിസ്റ്റർ ചെയ്തു.