ചരിത്ര വിജയത്തിന് പിന്നാലെ ബൈബിൾ വചനം പങ്കുവെച്ച് ബാസ്‌ക്കറ്റ്‌ബോൾ താരം

നോർത്ത് കരോലിന: ബാസ്‌ക്കറ്റ്‌ബോൾ കോർട്ടിലെ ചരിത്ര വിജയങ്ങൾക്കിടയിലും തന്റെ വിശ്വാസത്തിന് ഒന്നാം സ്ഥാനം നൽകി ഹൈ പോയിന്റ് യൂണിവേഴ്‌സിറ്റി താരം ചേസ് ജോൺസ്റ്റൺ. എൻസിഎഎ ടൂർണമെന്റിൽ വിസ്കോൺസിനെതിരെ നേടിയ അട്ടിമറി വിജയത്തിന് പിന്നാലെയാണ് തന്റെ ജീവിതലക്ഷ്യം കേവലം ഒരു കായികതാരമായിരിക്കുക എന്നതല്ലെന്ന് 26-കാരനായ ജോൺസ്റ്റൺ വ്യക്തമാക്കിയത്.

ടീമിനെ വിജയത്തിലേക്ക് നയിച്ചത് ബൈബിളിലെ യോഹന്നാൻ 15:13 എന്ന വചനമാണെന്ന് അദ്ദേഹം വെളിപ്പെടുത്തി. “തന്റെ സ്നേഹിതന് വേണ്ടി ജീവൻ അർപ്പിക്കുന്നതിനേക്കാൾ വലിയ സ്നേഹമില്ല” എന്ന ഈ വചനമാണ് ടീമിന്റെ കരുത്ത്. പ്രതിസന്ധികൾ വരുമ്പോൾ തളരാതെ പരസ്പരം സ്നേഹിക്കാനും വിശ്വസിക്കാനുമാണ് ഈ വചനം തങ്ങളെ പഠിപ്പിച്ചതെന്ന് ഒരു പോഡ്‌കാസ്റ്റ് അഭിമുഖത്തിൽ ജോൺസ്റ്റൺ പറഞ്ഞു.