ഡാളസിൽ പാസ്റ്റേഴ്സ് & ലീഡേഴ്സ് ഫാമിലി സെമിനാർ നവംബർ 14 ന്

വാർത്ത രാജു തരകൻ

ഡാളസ് : ഡാളസ് സിറ്റിവൈഡ് ഫെലോഷിപ്പിന്റെ ആഭിമുഖ്യത്തിൽ പാസ്റ്റർമാർക്കും സഭാ നേതാക്കൾക്കും അവരുടെ കുടുംബങ്ങൾക്കുമായി പ്രത്യേക സെമിനാർ സംഘടിപ്പിക്കുന്നു. നേതൃത്വത്തെ ശക്തിപ്പെടുത്തുക എന്നതാണ് സെമിനാറിന്റെ പ്രമേയം. നവംബർ 14 ശനിയാഴ്ച രാവിലെ 10 മുതൽ ഉച്ചയ്ക്ക് 12.30 വരെ റിച്ചാർഡ്സണിലുള്ള ഗ്രേസ് ക്രിസ്ത്യൻ അസംബ്ലിയിൽ വെച്ചാണ് സെമിനാർ നടക്കുന്നത്.

റവ. സതീഷ് കുമാറും ഡോ. സാബു സാമുവലും വിവിധ വിഷയങ്ങളിൽ ക്ലാസുകൾ നയിക്കും. ഡോ. തോമസ് ഇടിക്കുള മോഡറേറ്ററായിരിക്കും. ഡോ. വി. എ. വർഗ്ഗീസ് സമ്മേളനത്തിൽ അധ്യക്ഷത വഹിക്കും. സഭകളുടെ ആത്മീയ വളർച്ചയ്ക്കും നേതൃത്വത്തിന്റെ ശാക്തീകരണത്തിനും കുടുംബങ്ങളുടെ ആത്മീയ ഐക്യത്തിനും പ്രാധാന്യം നൽകുന്ന ഈ സെമിനാർ പാസ്റ്റർമാർക്കും സഭാ നേതാക്കൾക്കും അവരുടെ കുടുംബാംഗങ്ങൾക്കും ഒരുപോലെ പ്രയോജനകരമായിരിക്കുമെന്ന് സംഘാടകർ അറിയിച്ചു.

ഡാളസ് സിറ്റിവൈഡ് ഫെലോഷിപ്പ് ചെയർമാൻ പാസ്റ്റർ തോമസ് മുല്ലക്കൽ, സെക്രട്ടറി എസ്. പി. ജെയിംസ്, ട്രഷറർ തോമസ് ചെല്ലേത്ത് എന്നിവരുടെ നേതൃത്വത്തിൽ കമ്മിറ്റി അംഗങ്ങൾ സെമിനാറിന്റെ ക്രമീകരണങ്ങൾക്ക് നേതൃത്വം നൽകുന്നു. സെമിനാറിൽ പങ്കെടുക്കുന്നതിന് രജിസ്ട്രേഷൻ സൗജന്യമാണ്.