ആരാധനാലയങ്ങൾക്ക് കർശന നിയന്ത്രണങ്ങളുമായി യുഎഇ

അബുദാബി: ക്രൈസ്തവ ആരാധനാലയങ്ങൾക്കുള്ള നിയന്ത്രണങ്ങളും പിഴകളും കർശനമാക്കി യു.എ.ഇ ഭരണകൂടം. വിദേശബന്ധങ്ങൾ, അനുമതിയില്ലാത്ത പണസമാഹരണം, സുരക്ഷാ വീഴ്ചകൾ ഉൾപ്പെടെയുള്ള 24 നിയമലംഘനങ്ങൾക്കാണ് 7,50,000 ദിർഹം വരെ പിഴയും സസ്പെൻഷനും ഏർപ്പെടുത്തുന്ന പുതിയ ചട്ടങ്ങൾ പ്രാബല്യത്തിൽ കൊണ്ടുവന്നത്.

​വിദേശ സ്ഥാപനങ്ങളുമായോ നയതന്ത്ര കാര്യാലയങ്ങളുമായോ അനുമതിയില്ലാതെ ബന്ധം സ്ഥാപിക്കുന്നതിനാണ് ഏറ്റവും ഉയർന്ന പിഴ ചുമത്തുക. കൂടാതെ സോഷ്യൽ മീഡിയ വഴിയുള്ള പണസമാഹരണം, അംഗീകൃതമല്ലാത്ത സ്ഥലങ്ങളിലെ പ്രാർത്ഥനാ ചടങ്ങുകൾ, ദേശീയ ബാങ്കുകളിൽ അക്കൗണ്ടില്ലാതെ പ്രവർത്തിക്കൽ എന്നിവയ്ക്കും കടുത്ത സാമ്പത്തിക പിഴകൾ ഏർപ്പെടുത്തിയിട്ടുണ്ട്.

​ഭാരവാഹികളുടെ മാറ്റം, ലൈസൻസ് പുതുക്കൽ, വാർഷിക ബജറ്റ് സമർപ്പണം തുടങ്ങിയ ഭരണപരമായ കാര്യങ്ങളിലും പുതിയ മാർഗ്ഗനിർദ്ദേശങ്ങൾ വ്യക്തമാക്കുന്നു. ചട്ടങ്ങൾ ആവർത്തിച്ച് ലംഘിച്ചാൽ ആരാധനാലയങ്ങളുടെ പ്രവർത്തനം മൂന്ന് മാസത്തേക്ക് താൽക്കാലികമായി സസ്പെൻഡ് ചെയ്യുമെന്നും യു.എ.ഇ ഭരണകൂടം അറിയിച്ചു.