അമേരിക്കയുടെ 250-ാം ജന്മദിനം: പ്രാർത്ഥനാ യജ്ഞത്തോടെ തുടക്കം കുറിക്കാൻ ടെക്സസ്

ടെക്സസ് : അമേരിക്കയുടെ 250-ാം സ്വാതന്ത്ര്യ വാർഷികാഘോഷങ്ങൾക്ക് ആത്മീയ പൈതൃകം ഉയർത്തിപ്പിടിക്കുന്ന വൻ പ്രാർത്ഥനാ യജ്ഞത്തോടെ തുടക്കം കുറിക്കാൻ ടെക്സസ് തയ്യാറെടുക്കുന്നു. ആഘോഷങ്ങളുടെ ഔദ്യോഗിക ഉദ്ഘാടനത്തിന്റെ ഭാഗമായി ജൂൺ 28-ന് ടെക്സസിലെ ഗ്രെഗ് കൗണ്ടിയും ലോംഗ്വ്യൂ നഗരവും സംയുക്തമായി പ്രാദേശിക സഭകളെ ഏകോപിപ്പിച്ച് വിപുലമായ ആരാധനയും സംയുക്ത പ്രാർത്ഥനാ സമ്മേളനവും സംഘടിപ്പിക്കും.

ലോംഗ്വ്യൂവിലെ പ്രശസ്ത ക്രൈസ്തവ കലാലയമായ ലെതുർണോ സർവ്വകലാശാലയിലെ ബെൽച്ചർ സെന്ററാണ് ഈ ചരിത്രപരമായ പ്രാർത്ഥനാ സംഗമത്തിന് വേദിയാകുന്നത്. മേഖലയിലെ പന്ത്രണ്ടിലധികം പ്രമുഖ ക്രൈസ്തവ സഭകളിൽ നിന്നുള്ള പാസ്റ്റർമാരും ഗായകസംഘങ്ങളും ആരാധനാ നേതൃത്വങ്ങളും ഈ കൂട്ടായ്മയിൽ പങ്കുചേരും. രാജ്യത്തിന്റെ ചരിത്രത്തിലുടനീളം കാവലായിരുന്ന ദൈവത്തിന്റെ വിശ്വസ്തമായ സാന്നിധ്യത്തിന് നന്ദി പറയുന്നതിനും, വരുംതലമുറയെ ക്രിസ്തീയ സത്യങ്ങളിൽ വളർത്തുന്നതിനുമുള്ള ആഹ്വാനവും പ്രതിജ്ഞയും ഈ സമ്മേളനത്തിൽ പുതുക്കുമെന്ന് സംഘാടകർ അറിയിച്ചു.

1946-ൽ സ്ഥാപിതമായ ലെതുർണോ സർവ്വകലാശാല വിട്ടുവീഴ്ചയില്ലാത്ത ക്രൈസ്തവ മൂല്യങ്ങൾ ഉയർത്തിപ്പിടിക്കുന്ന ഒരു പ്രമുഖ വിദ്യാഭ്യാസ സ്ഥാപനമാണ്. ഗ്രേറ്റ് ബ്രിട്ടനിൽ നിന്നുള്ള അമേരിക്കയുടെ സ്വാതന്ത്ര്യ പ്രഖ്യാപനത്തിന്റെ 250-ാം വാർഷികത്തോടനുബന്ധിച്ച് രാജ്യത്തുടനീളം നിരവധി പരിപാടികൾ ആസൂത്രണം ചെയ്തിട്ടുണ്ടെങ്കിലും, വിശ്വാസത്തിലും പ്രാർത്ഥനയിലും അധിഷ്ഠിതമായ ഇത്തരം വലിയ സഭാ കൂട്ടായ്മകൾ ഈ ആഘോഷങ്ങൾക്ക് സവിശേഷമായ ആത്മീയ മുഖമാണ് നൽകുന്നത്.