*ഏഷ്യയിൽ ക്രിസ്തീയ ഐക്യം ശക്തമാക്കാൻ ആഹ്വാനം; തായ്‌ലൻഡിലെ എക്യുമെനിക്കൽ സമ്മേളനത്തിൽ ആർച്ച്ബിഷപ്പ് ഫെലിക്സ് മച്ചാഡോ*

തായ്ലൻഡ് : വിധ സഭകൾ തമ്മിലുള്ള ചർച്ചകളും പരസ്പര സഹകരണവും കൂടുതൽ ആഴത്തിലാക്കിക്കൊണ്ട് ക്രൈസ്തവ സഭകൾ തമ്മിലുള്ള ഐക്യം ശക്തമാക്കാൻ തായ്‌ലൻഡിൽ നടന്ന പ്രധാന എക്യുമെനിക്കൽ സമ്മേളനത്തിൽ ആത്മീയ നേതാക്കളോട് ആഹ്വാനം ചെയ്തു. സിനഡൽ സ്വഭാവവും സഭാ ഐക്യശ്രമങ്ങളും പരസ്പരം ആഴത്തിൽ ബന്ധപ്പെട്ടിരിക്കുന്നുവെന്നും, അവയെ സഭയുടെ പൊതുവായ ദൗത്യത്തിന്റെ ഭാഗമായി കാണണമെന്നും ഫെഡറേഷൻ ഓഫ് ഏഷ്യൻ ബിഷപ്സ് കോൺഫറൻസസ് എക്യുമെനിക്കൽ-മതാന്തര കാര്യാലയത്തിന്റെ ചെയർമാനും മുൻ ഇന്ത്യൻ ആർച്ച്ബിഷപ്പുമായ ഫെലിക്സ് ആന്റണി മച്ചാഡോ പ്രതിനിധികളോട് വ്യക്തമാക്കി.

തായ്‌ലൻഡിലെ ചിയാങ് മായിലുള്ള പായപ്പ് സർവകലാശാലയിൽ മെയ് 31 മുതൽ ജൂൺ 3 വരെ നടന്ന പ്രാദേശിക എക്യുമെനിക്കൽ കൂട്ടായ്മയായ ക്രിസ്ത്യൻ കോൺഫറൻസ് ഓഫ് ഏഷ്യ സംഘടിപ്പിച്ച സമ്മേളനത്തിലാണ് അദ്ദേഹം സംസാരിച്ചത്. കത്തോലിക്കാ സഭയിൽ ഇപ്പോൾ നടന്നുകൊണ്ടിരിക്കുന്ന ‘സിനഡിലിറ്റിക്ക് വേണ്ടിയുള്ള സിനഡ്’ വിശ്വാസത്തിൽ ഒരുമിച്ച് സഞ്ചരിക്കേണ്ടതിന്റെ പ്രാധാന്യമാണ് ഉയർത്തിക്കാട്ടുന്നതെന്നും, ഈ പ്രക്രിയ ക്രൈസ്തവ ഐക്യമെന്ന വലിയ ലക്ഷ്യത്തെ സ്വാഭാവികമായും പിന്തുണയ്ക്കുന്നുണ്ടെന്നും അദ്ദേഹം കൂട്ടിച്ചേർത്തു. മാമ്മോദീസയിലൂടെ ലഭിച്ച പൊതുവായ ക്രൈസ്തവ അസ്തിത്വത്തിൽ നിന്നാണ് സിനഡൽ സ്വഭാവവും സഭാ ഐക്യവും വളർന്നുവരുന്നതെന്നും, ഈ പൊതു അടിത്തറയുള്ളതിനാൽ പ്രാർത്ഥനയിലും ചിന്തയിലും മിഷനറി ദൗത്യങ്ങളിലും കൂടുതൽ അടുത്ത് പ്രവർത്തിക്കാൻ സഭകൾ ബാധ്യസ്ഥരാണെന്നും അദ്ദേഹം വിശദീകരിച്ചു.