*പേർഷ്യൻ ഉൾക്കടലിലെ യുദ്ധം: എമിറേറ്റ്സ് എയർലൈൻസിന് കനത്ത തിരിച്ചടി*

ഇറാൻ : പേർഷ്യൻ ഉൾക്കടലിൽ യുദ്ധം നീണ്ടുപോകുന്നത് ലോകത്തിലെ ഏറ്റവും വലിയ അന്താരാഷ്ട്ര എയർലൈനായ എമിറേറ്റ്സിനെ കടുത്ത പ്രതിസന്ധിയിലാക്കുന്നു. യുദ്ധഭീതിയെത്തുടർന്ന് യാത്രക്കാർ ഗൾഫ് മേഖല ഒഴിവാക്കുന്നതിനാൽ ദുബായിലേക്കുള്ള പല വിമാനങ്ങളും ശൂന്യമായാണ് സർവീസ് നടത്തുന്നത്. അമേരിക്കയിൽ നിന്നും യൂറോപ്പിൽ നിന്നുമുള്ള സർവീസുകളെയാണ് ഇത് ബാധിച്ചിരിക്കുന്നത്. പ്രാഗ്, ബുഡാപെസ്റ്റ് എന്നിവിടങ്ങളിൽ നിന്നുള്ള വിമാനങ്ങളിൽ കേവലം 5% മുതൽ 10% വരെ മാത്രമാണ് യാത്രക്കാരുള്ളതെന്ന് ബ്ലൂംബെർഗ് (Bloomberg) റിപ്പോർട്ട് ചെയ്യുന്നു.

അഞ്ഞൂറോളം പേർക്ക് യാത്ര ചെയ്യാവുന്ന എയർബസ് A380 ജംബോ വിമാനങ്ങൾ പോലും വെറും 35 യാത്രക്കാരുമായി കഴിഞ്ഞ ആഴ്ച സർവീസ് നടത്തി. ന്യൂയോർക്കിൽ നിന്നുള്ള വിമാനങ്ങളിൽ അഞ്ചിലൊന്ന് ടിക്കറ്റുകൾ മാത്രമാണ് വിറ്റുപോകുന്നത്. ചിക്കാഗോയിൽ നിന്നുള്ള സർവീസുകളും സമാനമായ രീതിയിൽ പകുതിയോളം ഒഴിഞ്ഞാണ് പറക്കുന്നത്. യുദ്ധം തുടരുന്നത് നെറ്റ്‌വർക്ക് പുനഃസ്ഥാപിക്കാനുള്ള എമിറേറ്റ്സിന്റെ ശ്രമങ്ങൾക്ക് വലിയ വെല്ലുവിളിയായി മാറിയിരിക്കുകയാണ്.