ന്യൂയോർക്കിൽ പ്രൈഡ് പതാകയേന്തി മൂന്ന് പള്ളികളിൽ അതിക്രമം

ന്യൂയോർക്ക് സിറ്റി: ക്വീൻസിലെ ഫാർ റോക്കാവേയിൽ എൽ ജി ബി ടി പ്രൈഡ് പതാകയുമായി എത്തിയ അജ്ഞാത വ്യക്തി മൂന്ന് പള്ളികളിൽ അതിക്രമിച്ച് കയറി നാശനഷ്ടങ്ങൾ വരുത്തി. ഒക്ടോബർ 5-ന് പുലർച്ചെ 1:40 നും 2:00 നും ഇടയിലാണ് ദി റെഫ്യൂജ് ചർച്ച് ഓഫ് ക്രൈസ്റ്റ്, ദി സിറ്റി ഓഫ് ഓയാസിസ് ചർച്ച് ഓഫ് ഡെലിവറൻസ്, സെൻ്റ് മേരീസ് സ്റ്റാർ ഓഫ് ദി സീ ചർച്ച് എന്നിവിടങ്ങളിൽ അതിക്രമം നടന്നത്.

മുഖംമൂടി ധരിച്ചെത്തിയ പ്രതി പള്ളികളുടെ ഭിത്തികളിൽ ക്രിസ്തുമത വിരുദ്ധമായ പ്രസ്താവനകൾ പെയിൻ്റ് ചെയ്യുകയും സെൻ്റ് മേരീസ് പള്ളിയിലെ മതപരമായ രണ്ട് പ്രതിമകളുടെ മുഖത്ത് പെയിൻ്റ് അടിക്കുകയും ചെയ്തു. റെയിൻബോ നിറത്തിലുള്ള മാസ്കും പ്രൈഡ് പതാകയും ധരിച്ച് പോകുന്ന പ്രതിയുടെ ദൃശ്യങ്ങൾ ന്യൂയോർക്ക് പോലീസ് ഡിപ്പാർട്ട്‌മെൻ്റ് പുറത്തുവിട്ടു. ഈ സംഭവത്തെ വിദ്വേഷ കുറ്റകൃത്യമായി കണക്കാക്കിയ പോലീസ് പൊതുജനങ്ങളുടെ സഹായം തേടിയിട്ടുണ്ട്. എൻ വൈ പി ഡി ഹേറ്റ് ക്രൈം ടാസ്‌ക് ഫോഴ്‌സ് സംഭവത്തിൽ അന്വേഷണം ആരംഭിച്ചു.