മാനുഷികതയുടെ സ്പാനിഷ് മോഡൽ: അഞ്ച് ലക്ഷം കുടിയേറ്റക്കാർക്ക് പുതുജീവൻ

സ്പെയിൻ : യൂറോപ്പിലെ പല രാജ്യങ്ങളും കുടിയേറ്റക്കാർക്ക് മുന്നിൽ വാതിലുകൾ കൊട്ടിയടയ്ക്കുമ്പോൾ, ലോകത്തിന് തന്നെ മാതൃകയാവുന്ന ചരിത്രപരമായ ഒരു പ്രഖ്യാപനവുമായി സ്പെയിൻ. രേഖകളില്ലാതെ രാജ്യത്ത് കഴിയുന്ന അഞ്ച് ലക്ഷത്തോളം കുടിയേറ്റക്കാർക്ക് നിയമപരമായ താമസാനുമതിയും ജോലി ചെയ്യാനുള്ള അവകാശവും നൽകാൻ പ്രധാനമന്ത്രി പെഡ്രോ സാഞ്ചസിന്റെ നേതൃത്വത്തിലുള്ള സർക്കാർ തീരുമാനിച്ചു. 2026 ഫെബ്രുവരിയിലെ ഈ നിർണ്ണായക നീക്കം സ്പെയിനിനെ സമാധാനത്തിന്റെയും കരുണയുടെയും പുതിയൊരു തലത്തിലേക്ക് എത്തിച്ചിരിക്കുകയാണ്.

കേവലം സാമ്പത്തിക ലക്ഷ്യങ്ങൾക്കപ്പുറം, കുടിയേറ്റക്കാരെ സ്വന്തം സഹോദരങ്ങളായി കണ്ട് അവരുടെ അന്തസ്സ് ഉറപ്പാക്കുകയാണ് ഈ നടപടിയുടെ ലക്ഷ്യമെന്ന് സർക്കാർ വ്യക്തമാക്കുന്നു. 2025 ഡിസംബർ 31-ന് മുമ്പ് അഞ്ച് മാസമെങ്കിലും രാജ്യത്ത് താമസിച്ച, ക്രിമിനൽ പശ്ചാത്തലമില്ലാത്തവർക്കാണ് ഈ സുവർണ്ണാവസരം ലഭിക്കുന്നത്.