അന്യഗ്രഹജീവികൾ വരുന്നു, സഭകളെ ഒരുക്കണം; പാസ്റ്റർമാർക്ക് യുഎസ് ഗവൺമെന്റിന്റെ രഹസ്യ നിർദ്ദേശമോ?

ടെക്സസ് : തന്റെ യൂട്യൂബ് ചാനലിലൂടെയാണ് പെറി സ്റ്റോൺ ഈ വിചിത്രമായ അവകാശവാദം ഉന്നയിച്ചത്. ഒരു വലിയ ചർച്ച് നടത്തുന്ന തന്റെ സുഹൃത്താണ് ഈ വിവരം തന്നോട് പറഞ്ഞതെന്ന് അദ്ദേഹം അവകാശപ്പെടുന്നു. ഒരു പ്രത്യേക സംസ്ഥാനത്ത് നടന്ന യോഗത്തിൽ പങ്കെടുത്ത പാസ്റ്റർമാരോട്, ഉടൻ പുറത്തുവരാനിരിക്കുന്ന വെളിപ്പെടുത്തലുകൾക്ക് വിശ്വാസികളെ തയ്യാറാക്കണമെന്ന് സർക്കാർ പ്രതിനിധികൾ ആവശ്യപ്പെട്ടത്രേ. ഭൂമിയിൽ നിന്നല്ലാത്ത വസ്തുക്കൾ കൊണ്ട് നിർമ്മിച്ച വാഹനങ്ങളെക്കുറിച്ചും, സയൻസ് ഫിക്ഷൻ സിനിമകളിലേതുപോലെ വിചിത്രമായ ഉരഗ രൂപികളായ ജീവികളെക്കുറിച്ചും ഉടൻ വിവരങ്ങൾ പുറത്തുവരുമെന്നാണ് അദ്ദേഹം പറയുന്നത്. ഇങ്ങനെയുള്ള കാര്യങ്ങൾ കേൾക്കുമ്പോൾ വല്ലാത്തൊരു പന്തികേട് തോന്നുന്നില്ലേ? നിങ്ങൾ തന്നെ ഒന്ന് ചിന്തിച്ചു നോക്കൂ!

അന്യഗ്രഹജീവികളെക്കുറിച്ചുള്ള വെളിപ്പെടുത്തലുകൾ ഉണ്ടാകുമ്പോൾ പല വിശ്വാസികളും തങ്ങളുടെ വിശ്വാസത്തെ ചോദ്യം ചെയ്യുമെന്നും, അവിശ്വാസികൾ വിശദീകരണത്തിനായി പാസ്റ്റർമാരെ സമീപിക്കുമെന്നും ഉദ്യോഗസ്ഥർ മുന്നറിയിപ്പ് നൽകിയതായി സ്റ്റോൺ പറയുന്നു. ഭാവിയിൽ നടക്കാനിരിക്കുന്ന ‘റാപ്‌ചർ’ (വിശ്വാസികളെ ദൈവം സ്വർഗ്ഗത്തിലേക്ക് കൊണ്ടുപോകുന്നത്) ഒരു അന്യഗ്രഹ അധിനിവേശമാണെന്ന് വരുത്തിത്തീർക്കാൻ സർക്കാർ വ്യാജ കഥകൾ ഉണ്ടാക്കുമെന്നും അദ്ദേഹം ആരോപിക്കുന്നു. തന്റെ മകന്റെ ചിന്തകളെ ഉദ്ധരിച്ചാണ് അദ്ദേഹം ഈ നിഗമനത്തിൽ എത്തിയത്. കഴിഞ്ഞ വർഷത്തെ സംഭവവികാസങ്ങൾ വെച്ച് നോക്കുമ്പോൾ റാപ്‌ചറിന് അന്യഗ്രഹജീവികളെ പഴിചാരുന്നത് വളരെ സാധ്യതയുള്ള കാര്യമാണെന്നും അദ്ദേഹം വിശ്വസിക്കുന്നു.