രഹസ്യ കോഡുകൾ: തുർക്കിയിലെ നിശബ്ദമായ വിശ്വാസവേട്ട തുടരുന്നു

തുർക്കി : N-82, G-87 എന്നീ രഹസ്യ സുരക്ഷാ കോഡുകൾ ഉപയോഗിച്ച് തുർക്കി ഭരണകൂടം 300-ലധികം വിദേശ മിഷനറിമാരെയും അവരുടെ കുടുംബങ്ങളെയും രാജ്യത്തുനിന്ന് നിഷ്കരുണം തുടച്ചുനീക്കുന്നു. ദശാബ്ദങ്ങളായി തുർക്കിയെ സ്വന്തം മണ്ണായി കണ്ടവർ ഒരു സുപ്രഭാതത്തിൽ “ദേശീയ സുരക്ഷാ ഭീഷണി” എന്ന മുദ്രകുത്തപ്പെട്ട് പുറന്തള്ളപ്പെടുന്നു. യൂറോപ്യൻ പാർലമെന്റ് 502 വോട്ടുകൾക്ക് ഈ നടപടിയെ അപലപിച്ച് പ്രമേയം പാസാക്കിയെങ്കിലും, ആഗോള പ്രതിഷേധങ്ങളെ പുച്ഛിച്ചുതള്ളിക്കൊണ്ട് തുർക്കി വിദേശകാര്യ മന്ത്രാലയം തങ്ങളുടെ നിലപാട് കടുപ്പിച്ചു.

അങ്കാറയിലെ അധികാര ഇടനാഴികളിൽ രൂപപ്പെട്ട ഈ അടിച്ചമർത്തൽ നിയമത്തിന്റെ മറവിൽ ഒളിപ്പിച്ചുവച്ചിരിക്കുന്ന ആസൂത്രിതമായ വിശ്വാസ വേട്ടയാണ്. നീതി നിഷേധിക്കപ്പെട്ട നൂറുകണക്കിന് കുടുംബങ്ങൾ ഒരു വിശദീകരണവുമില്ലാതെ നാടുകടത്തപ്പെടുമ്പോൾ അവിടെ അവശേഷിക്കുന്നത് ഭീതിയുടെ നിഴൽ മാത്രമാണ്. ഇതൊരു സാധാരണ ഭരണപരമായ നടപടിയല്ല, മറിച്ച് ക്രൈസ്തവ സാന്നിധ്യത്തെ അദൃശ്യമാക്കാൻ നടത്തുന്ന നീക്കമാണ്. നിഗൂഢതയുടെ തിരശ്ശീലയ്ക്കുള്ളിൽ ഈ വേട്ടയാടൽ ഇപ്പോഴും തുടരുന്നു.