റിയാദിലും ജിദ്ദയിലും ശക്തമായ മഴ; തബൂക്കില്‍ റെഡ് അലേര്‍ട്ട്‌, നാളെ കൂടി ജാഗ്രത തുടരണം
റിയാദ് : സൗദിയുടെ തലസ്ഥാന നഗരിയില്‍ തിങ്കളാഴ്ച സാമാന്യം ശക്തമായ മഴ ലഭിച്ചു. ജിദ്ദ, മക്ക ഉള്‍പ്പെടെ മറ്റു ചില നഗരങ്ങളിലും ഇന്നലെ സാമാന്യം ശക്തമായ മഴയുണ്ടായി. വടക്കന്‍ തബൂക്ക് മേഖലയിലെ നിരവധി ഗവര്‍ണറേറ്റുകളില്‍ കനത്ത മഴയ്ക്ക് സാധ്യതയുണ്ടെന്ന് നാഷണല്‍ സെന്റര്‍ ഓഫ് മെറ്റീരിയോളജി (NCM) അറിയിച്ചതിനാല്‍ റെഡ് അലേര്‍ട്ട്‌ പുറപ്പെടുവിച്ചു. വടക്കന്‍ തബൂക്ക് മേഖലയിലെ വിവിധ ഗവര്‍ണറേറ്റുകളില്‍ കനത്ത മഴയോടൊപ്പം അതിവേഗ കാറ്റ്, ദൂരക്കാഴ്ച കുറയല്‍, ആലിപ്പഴ വര്‍ഷവും മിന്നല്‍ പ്രളയവും ഉണ്ടാവുമെന്നാണ് മുന്നറിയിപ്പ്. ഉച്ചയ്ക്ക് ഒരു മണി വരെ തബൂക്ക് മേഖലയില്‍ കാലാവസ്ഥാ മാറ്റത്തിന്റെ സ്വാധീനം പ്രകടമായിരുന്നു.
സൗദി അറേബ്യയിലെ മിക്ക പ്രദേശങ്ങളിലും തിങ്കള്‍ മുതല്‍ ബുധനാഴ്ച വരെ കാലാവസ്ഥാ വ്യതിയാനവും മഴയും പ്രതീക്ഷിക്കുന്നതിനാല്‍ പൊതുജനങ്ങളോട് അതീവ ജാഗ്രത പുലര്‍ത്തണമെന്ന് സിവില്‍ ഡിഫന്‍സ് അഭ്യര്‍ഥിച്ചു. മഴയും കാറ്റും കാരണം രാജ്യത്തെ വിവിധ പ്രദേശങ്ങളില്‍ ഇന്ന് വിദ്യാഭ്യാസ സ്ഥാപനങ്ങള്‍ക്ക് അവധി പ്രഖ്യാപിച്ചിട്ടുണ്ട്. ഓണ്‍ലൈന്‍ പ്ലാറ്റ് ഫോം വഴിയായിരിക്കും പഠനം. റിയാദ്, മജ്മഅ, അല്‍ റാസ്, ഖസീം, റാബിഗ്, ഉനൈസ, മദ്‌നബ്, സല്‍ഫി, അല്‍ ഗാഥ്, ശഖ്റ, ഹഫര്‍ അല്‍ബാത്തിന്‍, ഹായില്‍ എന്നിവിടങ്ങളില്‍ വിദ്യാഭ്യാസ സ്ഥാപനങ്ങള്‍ക്ക് അവധിയായിരിക്കും.
മദീനയിലും തബൂക്ക് മേഖലകളിലും അവയുടെ തീരപ്രദേശങ്ങളിലും സജീവമായ കാറ്റ്, പൊടിക്കാറ്റ്, ആലിപ്പഴം, ഇടത്തരം മുതല്‍ കനത്ത ഇടിമിന്നല്‍ എന്നിവ എന്‍സിഎം പ്രവചിക്കുന്നു. മക്ക, ഹായില്‍, അല്‍ ജൗഫ്, വടക്കന്‍ അതിര്‍ത്തി മേഖല, അല്‍ ഖസീം, കിഴക്കന്‍ പ്രവിശ്യയുടെ വടക്കന്‍ ഭാഗങ്ങള്‍ എന്നിവിടങ്ങളില്‍ ശക്തമായ മഴയുണ്ടാകും. നജ്റാന്‍, ജിസാന്‍, അസീര്‍, അല്‍ബാഹ എന്നീ പ്രദേശങ്ങളുടെ ചില ഭാഗങ്ങളില്‍ തിരശ്ചീന ദൃശ്യപരത പരിമിതപ്പെടുത്തുന്ന പൊടിക്കാറ്റിനൊപ്പം ഇടിമിന്നലും ഉണ്ടാവുമെന്ന് എന്‍സിഎം അറിയിച്ചു. ഹായില്‍, അല്‍-ജൗഫ്, വടക്കന്‍ അതിര്‍ത്തി മേഖല, തബൂക്ക്, മദീനയുടെ വടക്കന്‍ ഭാഗങ്ങള്‍ എന്നിവിടങ്ങളിലെ താപനിലയില്‍ കുറവുണ്ടാകും. ചെങ്കടലിലെ തെക്കുപടിഞ്ഞാറന്‍ ഉപരിതല കാറ്റ് വടക്ക് പടിഞ്ഞാറന്‍ ഭാഗത്തേക്ക് മണിക്കൂറില്‍ 25-50 കിലോമീറ്റര്‍ വേഗതയില്‍ വടക്ക്, മധ്യ ഭാഗങ്ങളിലേക്ക് നീങ്ങുമെന്നും ഇടിമിന്നലിനൊപ്പം മണിക്കൂറില്‍ 60 കിലോമീറ്റര്‍ വേഗതയില്‍ കാറ്റ് വീശുമെന്നും റിപോര്‍ട്ടില്‍ പറയുന്നു. പൊതുജനങ്ങള്‍ ജാഗ്രത പാലിക്കണമെന്നും സുരക്ഷിത സ്ഥലങ്ങളില്‍ തുടരണമെന്നും ജനറല്‍ ഡയറക്ടറേറ്റ് ഓഫ് സിവില്‍ ഡിഫന്‍സ് അറിയിച്ചു. വെള്ളപ്പൊക്കവും വെള്ളക്കെട്ടും ഉള്ള സ്ഥലങ്ങളിലേക്ക് പോകരുത്. മഴവെള്ളം അടിഞ്ഞുകൂടുന്ന വെള്ളച്ചാട്ടങ്ങളും താഴ്വരകളും മുറിച്ചുകടക്കുന്നത് അപകടമാണ്. ബുധനാഴ്ച വരെ കാലാവസ്ഥാ വ്യതിയാനങ്ങളും മഴയും തുടരുന്നതിനാല്‍ മാധ്യമങ്ങളിലൂടെയും സമൂഹമാധ്യമങ്ങളിലൂടെയും നല്‍കിയ നിര്‍ദേശങ്ങള്‍ കര്‍ശനമായി പാലിക്കാന്‍ ഡയറക്ടറേറ്റ് ആവശ്യപ്പെട്ടു.
മക്ക മേഖലയില്‍ സാമാന്യം ശക്തമായ മഴയാണ് പെയ്യുന്നത്. ഇത് പേമാരിക്കും ആലിപ്പഴ വര്‍ഷത്തിനും പൊടിക്കാറ്റിനും കാരണമാകുമെന്നും ഡയറക്ടറേറ്റ് അറിയിച്ചു. മക്ക നഗരം, ത്വാഇഫ്, മെയ്സാന്‍, അദം, അല്‍അര്‍ദിയാത്ത്, തുറബ, റാനിയ, അല്‍മാവിയ, അല്‍ഖുര്‍മ, അല്‍ജുമൂം, ഖുലൈസ്, ബഹ്റ എന്നിവ ഇതില്‍ ഉള്‍പ്പെടുന്നു. മക്ക മസ്ജിദുല്‍ ഹറാമില്‍ ഇന്നലെ പെയ്ത ചാറ്റല്‍ മഴയുടെ വീഡിയോ അല്‍ഇഖ്ബാരിയ ന്യൂസ് എക്‌സില്‍ പങ്കുവച്ചു. റിയാദ് മേഖലയില്‍ അഫീഫ്, അല്‍ദവാദ്മി, അല്‍കുവൈയ, അല്‍മജ്മ, താദിഖ്, മര്‍റത്ത്, അല്‍ഗാത്ത്, അല്‍സുല്‍ഫി, ഷഖ്‌റ എന്നിവയുള്‍പ്പെടെ റിയാദ് മേഖലയിലെ വിവിധ ഗവര്‍ണറേറ്റുകളിലും പട്ടണങ്ങളിലും സാമാന്യം ശക്തമായ മഴയും പൊടിക്കാറ്റും പ്രതീക്ഷിക്കുന്നു. തബൂക്ക്, അല്‍ജൗഫ്, വടക്കന്‍ അതിര്‍ത്തി, മദീന, ഹായില്‍, അല്‍ഖസീം, കിഴക്കന്‍ പ്രവിശ്യ എന്നിവിടങ്ങളിലും മഴയും പൊടിക്കാറ്റുമുണ്ടാവും.
