ദൈവത്തോടുള്ള ചോദ്യങ്ങൾ ഗ്രാഫിറ്റി രൂപത്തിൽ: കാൻ്റർബറി കത്തീഡ്രലിൽ വൻ വിവാദം

കാൻ്റർബറി : ക്രിസ്ത്യാനിറ്റിയുടെ ഏറ്റവും ചരിത്രപരമായ കേന്ദ്രങ്ങളിലൊന്നായ കാൻ്റർബറി കത്തീഡ്രലിനുള്ളിൽ സ്ഥാപിച്ച പുതിയ ഗ്രാഫിറ്റി-ശൈലിയിലുള്ള കലാപ്രദർശനം ലോകമെമ്പാടുമുള്ള സഭാനേതാക്കൾക്കിടയിലും രാഷ്ട്രീയ നേതാക്കൾക്കിടയിലും വൻ വിവാദത്തിന് തിരികൊളുത്തിയിരിക്കുകയാണ്. ഒരു സഹസ്രാബ്ദത്തിലേറെയായി ആംഗ്ലിക്കൻ ആരാധനയുടെയും തീർത്ഥാടനത്തിൻ്റെയും കേന്ദ്രമായ ഈ കത്തീഡ്രലിൽ ഹിയർ അസ് എന്ന പേരിൽ ആരംഭിച്ച ഈ ഇൻസ്റ്റലേഷൻ സന്ദർശകരെ ദൈവത്തോട് ചോദ്യങ്ങൾ ചോദിക്കാൻ ക്ഷണിക്കുന്നതാണ്.

നിങ്ങൾ അവിടെയുണ്ടോ, സ്നേഹമാണ് ശക്തമെങ്കിൽ എന്തിനാണ് നിങ്ങൾ വെറുപ്പ് സൃഷ്ടിച്ചത്, എല്ലാത്തിനും ആത്മാവുണ്ടോ തുടങ്ങിയ ചോദ്യങ്ങളാണ് എഴുതിയിരിക്കുന്നത്. ഈ ചോദ്യങ്ങൾ കത്തീഡ്രലിൻ്റെ നൂറ്റാണ്ടുകൾ പഴക്കമുള്ള കൽച്ചുമരുകളിലും തറകളിലും ഗ്രാഫിറ്റി അക്ഷരങ്ങളിൽ പ്രദർശിപ്പിക്കുകയും ചെയ്തിട്ടുണ്ട്. അമേരിക്കൻ വൈസ് പ്രസിഡൻ്റ് ജെ ഡി വാൻസ് ഈ പ്രോജക്റ്റിനെ ശക്തമായി അപലപിച്ചു. ശതകോടീശ്വരനായ ഇലോൺ മസ്‌ക് ഈ പ്രവർത്തിയെ സ്വയം നശീകരണം എന്ന് വിശേഷിപ്പിച്ചു. ഒക്ടോബർ 17-ന് ആരംഭിച്ച ഈ പ്രദർശനം അടുത്ത വർഷം ജനുവരി 18 വരെ കത്തീഡ്രലിൽ ഉണ്ടായിരിക്കും.